ИЕРУСАЛИМ. 11 тамыз. ИНТЕРФАКС. Израиль радикалды палестиналық ХАМАС қозғалысына қарсы әскери әрекеттерді оны толық жойғанға дейін тоқтатпайды, деп мәлімдеді Израиль премьер-министрі Биньямин Нетаньяху.
«Егер ХАМАС қаруын тапсырып, барлық қалған тұтқындарды босатса, соғыс ертең-ақ аяқталуы мүмкін», – деді ол шетелдік БАҚ үшін өткен баспасөз мәслихатында.
Премьер-министрдің айтуынша, «ХАМАС-тың қару тапсырудан бас тартуын ескере отырып, Израильдің бастағанын аяқтап, ХАМАС-ты түбегейлі талқандаудан басқа таңдауы жоқ».
Нетаньяху Израиль қорғаныс армиясына (ЦАХАЛ) «Газа қаласында және сектордың орталық өңірлерінде ХАМАС-тың қалған екі тірек ошағын жою» жөнінде тапсырма берілгенін хабарлады.
Оның сөзінше, бұл жоспар іске асырылар алдында азаматтық тұрғындарға соғыс жүріп жатқан аймақтардан шығуға және арнайы белгіленген қауіпсіз аймақтарда қалуға мүмкіндік жасалады.
Жеке өткен баспасөз жиынында Нетаньяху, ХАМАС-тың мәміле жасауға қойған шарттары іске асуы мүмкін еместігін, бұл тұрғыда АҚШ-тың да ұстанымы Израильмен үндес екенін жеткізді.
Нетаньяху Израиль әскерін Газа секторынан толық шығару және қақтығыстың қайта жалғасуына тосқауыл болатын халықаралық кепілдіктер беру талаптарын орындалмайтын әрі қабылдауға келмейтін деп атады.
«Бұл – капитуляция шарттары. Мұндай талаптарды бірде-бір жауапты үкімет қабылдамайды, әрі мен де қабылдамаймын», – деп түйіндеді Израиль премьер-министрі.
