Лондон, 19 маусым. ИНТЕРФАКС — Иран болашақта Ормуз бұғазы арқылы өтетін кемелерден сақтандыру төлемін алу құқығын өзінде қалдыратынын мәлімдеді.
Financial Times газетінің хабарлауынша, Иранның Парсы шығанағындағы Ормуз бұғазын басқару агенттігі (PGSA) барлық кемелердің агенттік мақұлдаған жарамды сақтандыру полисі болуы тиіс екенін жариялаған.
Қазіргі уақытта бұл қызмет тегін көрсетіледі. Алайда биыл мамыр айында құрылған PGSA болашақта сақтандыру жарналарын енгізу мүмкіндігін жоққа шығармайды. Төлем мөлшерін тиісті сақтандыру ұйымдары анықтайды.
Ирандық шенеуніктің айтуынша, АҚШ пен Иран арасындағы меморандумға сәйкес, құжат күшіне енгеннен кейінгі алғашқы 60 күн ішінде Ормуз бұғазы арқылы кеме қатынасы ешқандай төлемсіз жүзеге асырылады.
Алайда осы мерзім аяқталған соң, Иран мен Оман жаңа тәртіпті келісуі мүмкін. Ол қауіпсіз өтуді қамтамасыз ету және көрсетілетін қызметтер үшін төлем енгізуді қамтуы ықтимал.
Financial Times мұндай бастама теңіз тасымалы саласындағы компаниялардың алаңдаушылығын күшейтетінін атап өтті. Олардың пікірінше, Иран бұғазды пайдаланғаны үшін міндетті төлем енгізетін жаңа режим орнатуға ұмтылуы мүмкін.
Бұған дейін PGSA әлеуметтік желіде АҚШ пен Иран келіссөздері жүретін 60 күн ішінде кемелердің Ормуз бұғазынан тегін өтетінін растаған болатын. Дегенмен кеме иелері алдын ала рұқсат алып, қозғалыс уақыты мен бағытын Иран тарапымен келісуге міндетті. Бұл талап бұғаздың кейбір аудандарында әлі де миналардың сақталуына байланысты енгізілген.
