Астана, 19 маусым. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев жануарлар дүниесін қорғау, орман және аңшылық шаруашылығы мәселелеріне қатысты заңға және оған ілеспе құжатқа қол қойды.
Заңдағы өзгерістер жануарлар дүниесін қорғау, көбейту және пайдалану саласындағы мемлекеттік реттеуді жетілдіруге бағытталған. Атап айтқанда, тұтқында немесе жартылай еркін жағдайда өсірілген сирек әрі жойылып кету қаупі бар жануарларды тіркеу тәртібі енгізіледі. Бұл заңсыз ауланған жануарларды заңдастырудың алдын алуға мүмкіндік береді. Сондай-ақ қоғамдық бақылау күшейтіледі.
Құжатқа сәйкес, аң аулау кезінде түнгі көру құрылғыларын, оның ішінде инфрақызыл, электронды-оптикалық және жылу бейнелеу құрылғыларын пайдалануға тыйым салынады. Сонымен қатар, егерьдің сүйемелдеуінсіз құр аулауға да тыйым енгізілді.
Аңшылық қағидаларын және жануарлар дүниесін пайдалану талаптарын бұзғаны үшін жауапкершілік күшейтіледі. Оның ішінде жабайы жануарларды, өсімдіктерді және олардың туындыларын, сондай-ақ киік мүйіздерін заңсыз жарнамалау, тасымалдау, сақтау және сатуға қатысты жазалар қатаңдатылады.
Заңда жануарлардың мекен ету ортасы мен көші-қон жолдарын сақтау, инфрақұрылым нысандарын салу және пайдалану кезінде олардың қырылуына жол бермеу талаптары қарастырылған. Электр беру желілерінде құстарды қорғайтын арнайы құрылғыларды орнату ұғымы енгізілді.
Сонымен қатар, жануарларға қатыгездік көрсеткені үшін әкімшілік және қылмыстық жауапкершілік күшейтіледі.
Түзетулер экологиялық талаптарды сақтай отырып, жекелеген аумақтарда ірі туристік жобаларды жүзеге асыруға мүмкіндік береді. Сондай-ақ ағашты терең өңдеу және орман өрттерінің салдарын жою жобалары үшін Қазақстан азаматтары мен заңды тұлғаларына ұзақ мерзімді орман пайдалану құқығы беріледі.
Бұдан бөлек, аңшылық мамандары мен аңшылық шаруашылықтары басшыларының әкімшілік құқық бұзушылықтардың жолын кесу жөніндегі өкілеттіктері кеңейтілді. Автоматтандырылған мониторинг жүйелері тіркеген экологиялық заң бұзушылықтарға бақылау күшейтіледі.
Әкімшілік құқық бұзушылық туралы кодекске қоршаған ортаға шығарылатын эмиссияларды автоматты түрде бақылау жүйелерін орнату және пайдалану талаптарын бұзғаны үшін жауапкершілікті көздейтін жаңа бап енгізілді.
Президент сондай-ақ Қылмыстық кодекс пен Әкімшілік құқық бұзушылық туралы кодекске өзгерістер енгізетін ілеспе заңға да қол қойды.
