Мәскеу. 14 шілде. ИНТЕРФАКС – Иран АҚШ-тың теңіз қоршауы уақытша тоқтатылған кезеңде кемінде 57 млн баррель мұнайды экспортқа шығарды. Бұл туралы Bloomberg агенттігі хабарлады.
АҚШ президенті Дональд Трамп Вашингтонның Иран порттарына кіретін және шығатын кемелерге қатысты теңіз қоршауын қайта енгізетінін мәлімдеді. Оның айтуынша, АҚШ Ормуз бұғазындағы кеме қатынасының қауіпсіздігіне кепілдік беруші рөлін атқарып, қауіпсіздікті қамтамасыз ету шығындарын өтеу мақсатында кемелерден тасымалданатын жүктің құнының 20 пайызы мөлшерінде төлем алуды жоспарлап отыр.
Бұл шешім Вашингтон мен Тегеран өзара түсіністік туралы меморандумға қол қойғаннан кейін бір айға жетпейтін уақыт өткен соң қабылданды. Аталған құжаттың нәтижесінде Ормуз бұғазы арқылы кеме қатынасы қайта жанданған болатын.
Осы аралықта Иран тәулігіне кемінде 2,2 млн баррель мұнай экспорттаған. Bloomberg мәліметінше, бұл соңғы уақыттағы жоғары көрсеткіштердің бірі. Сонымен қатар нақты экспорт көлемі бұдан да көп болуы мүмкін, өйткені Иран жүк тасымалы туралы мәліметтердің бір бөлігін жарияламауы ықтимал.
Көрсетілген көлемге Иранның экспорттық терминалдарынан жөнелтілген мұнаймен қатар, Оман шығанағындағы Иран порттарының бірінде қоршауда тұрған танкерлердегі мұнай да енгізілген.
Иран мұнайының әлемдік нарыққа қайта шығуы АҚШ пен Иран алдын ала келісімге қол қойғаннан кейінгі алғашқы екі аптада мұнай бағасының айтарлықтай төмендеуіне ықпал етті. Алайда дүйсенбі күні Дональд Трамп Иранға қарсы теңіз қоршауы қайта енгізілетінін мәлімдегеннен кейін мұнай бағасы 9 пайыздан астам өсті.
