Иерусалим. 4 қаңтар. ИНТЕРФАКС – Израиль Премьер-министрі Биньямин Нетаньяху жексенбі күні жасаған мәлімдемесінде Иран аумағынан байытылған уранды шығарып, елдегі ядролық нысандарға нақты әрі тиімді бақылау орнату қажет екенін айтты.
Үкімет отырысында сөйлеген сөзінде ол Иран тақырыбы өткен аптада АҚШ президенті Дональд Трамппен өткізілген келіссөздерде қозғалған негізгі мәселелердің бірі болғанын атап өтті.
«Біз Иранда уран байытуға жол берілмеуі тиіс деген ортақ ұстанымымызды қуаттадық. Сондай-ақ Ираннан 400 килограмм байытылған уранды шығарып, оның ядролық нысандарына толыққанды және шынайы бақылау орнату қажет», – деп келтіреді The Times of Israel Нетаньяхудың сөзін.
Сонымен қатар премьер-министр Ирандағы наразылық акцияларына қолдау білдіріп, елдің азаматтары өз тағдырын өз қолына алатын сәттің таяғанына үміт білдірді.
Нетаньяху АҚШ-тың Венесуэла президенті Николас Мадуроны ұстау операциясын да қолдайтынын мәлімдеді. Ол сондай-ақ Трамппен Газа секторындағы жағдайды да талқылағанын айтты. Оның сөзінше, АҚШ президенті ХАМАС қозғалысын қарусыздандыруға нақты ниетті. «Басқа жол жоқ. Бұл – Трамптың 20 тармақтан тұратын бейбіт жоспарын іске асыру үшін қажетті негізгі шарт», – деді ол.
Айта кетейік, 2025 жылғы 13 маусымда Израиль Иранның ядролық бағдарламасын жою мақсатында әскери операция бастаған болатын. Жауап ретінде Иран да Израильге соққы жасай бастады. 22 маусымда АҚШ Иранның Фордо, Исфахан және Натанз қалаларындағы үш ядролық нысанына әуе шабуылын жасады. Кейінірек президент Трамп екі тарап – Иран мен Израиль – келісімге келген уақытша бітім жариялады.
Желтоқсан айының соңында Нетаньяхумен бірлескен баспасөз мәслихатында сөйлеген Трамп Иран ядролық бағдарламасын қайта бастауға әрекеттенсе, оның салдары ауыр болатынын ескерткен еді.
