Пекин. 26 желтоқсан. ИНТЕРФАКС – Қытай билігі қорғаныс саласымен байланысты АҚШ-тың 20 компаниясына қатысты шектеу шараларын енгізу туралы шешім қабылдады. Бұл туралы жұма күні ҚХР Сыртқы істер министрлігі хабарлады.
Қытай СІМ өкілінің айтуынша, АҚШ-тың Тайваньға қару-жарақтың ауқымды көлемде сатылатыны жөніндегі соңғы мәлімдемесіне жауап ретінде Қытай әскери салаға қатысы бар 20 америкалық компанияға, сондай-ақ соңғы жылдары Тайваньды қаруландырумен айналысқан 10 компания басшысына қарсы қарсы шаралар қолдануды жөн көрген.
Сонымен қатар Қытай Сыртқы істер министрлігі АҚШ-ты Тайвань бұғазындағы бейбітшілік пен тұрақтылықты бұзатын әрекеттерді тоқтатуға және Тайваньға қару жеткізуді доғаруға тағы да шақырды.
«Тайваньға қару сатумен айналысқан кез келген компания немесе жеке тұлға бұл әрекеті үшін жауапкершілікке тартылады», – деп мәлімдеді Қытай СІМ өкілі. Оның сөзі ведомствоның ресми сайтында жарияланды.
Азия бұқаралық ақпарат құралдарының мәліметінше, енгізілген санкциялар Қытай аумағында орналасқан аталған заңды және жеке тұлғалардың барлық активтерін бұғаттауды, сондай-ақ қытайлық компаниялар мен азаматтарға олармен іскерлік байланыс орнатуға тыйым салуды көздейді.
Бұған дейін желтоқсан айында АҚШ президенті Дональд Трамптың әкімшілігі Тайваньға жалпы құны 10 млрд АҚШ долларынан асатын көлемде қару-жарақ жеткізілетінін жариялаған болатын.
Тайвань мәселесі 1949 жылы Қытай Халық Республикасы құрылғаннан кейін пайда болды. Сол кезде Қытайдың Гоминьдан партиясының бір бөлігі Тайвань аралына көшіп барып, оны Тайваньдағы Қытай Республикасы деп атады. Пекин «бір Қытай» қағидатын ұстанып келеді, оған сәйкес ҚХР мен Тайваньдағы Қытай Республикасын бір мезгілде мойындауға болмайды. Соған қарамастан, әлемнің көптеген ірі мемлекеттерінде Тайбэйдің ресми емес мәдени және экономикалық өкілдіктері жұмыс істейді.
