Астана. 14 шілде. ИНТЕРФАКС-ҚАЗАҚСТАН – Қазақстанның Премьер-министрі Олжас Бектенов Алматыдағы ЖЭО-3-ті жаңғырту жұмыстарын биылғы жылдың соңына дейін аяқтауды талап етіп, жоба мерзімі бұзылған жағдайда Энергетика министрлігі басшылығының жеке жауапкершілігі қаралатынын мәлімдеді.
«Алматыдағы жылу электр орталықтарын, сондай-ақ Түркістан облысындағы бу-газ қондырғысын уақытылы пайдалануға беру үшін Энергетика министрлігі мен “Самұрық-Қазына” қоры басшылығының жеке жауапкершілігін еске саламын», – деді Бектенов сейсенбі күні өткен Үкімет отырысында.
Ол өткен аптада Энергетика министрі Алматыға барып, ЖЭО-2 мен ЖЭО-3-тегі жұмыстардың барысын тексергенін атап өтті.
«ЖЭО-3 бойынша жағдай қанағаттанарлықсыз. Жұмыс қарқыны өте төмен. Егер нысанды жыл соңына дейін аяқтамасаңыздар, жеке жауапкершілік мәселесі қаралады. Бұл жұмысты күнделікті бақылауға алыңыздар. Мерзімнен кешігуге жол беруге болмайды», – деді Премьер-министр.
Бұған дейін Энергетика министрлігі биыл Алматы энергетикалық торабындағы бірнеше нысанда жөндеу жұмыстары жүргізілетінін хабарлаған болатын. Атап айтқанда, ЖЭО-1-де бір қазандық пен бір турбоагрегат жөнделеді. ЖЭО-2-де бір қазандық пен екі турбоагрегатқа күрделі жөндеу жүргізіледі. Ал ЖЭО-3-те бір қазандық пен бір турбоагрегат жаңғыртылады.
