Астана. 29 сәуір. ИНТЕРФАКС-ҚАЗАҚСТАН – Парламент Мәжілісі сәрсенбі күнгі жалпы отырыста «Қазақстан Республикасының кейбір заңнамалық актілеріне педагог мәртебесі және білім беру мәселелері бойынша өзгерістер мен толықтырулар енгізу туралы» заң жобасын бірінші оқылымда мақұлдады.
Мәжілістің әлеуметтік-мәдени даму комитетінің қорытындысына сәйкес, заң жобасының негізгі ережелері педагогтардың құқықтарын қорғауға және олардың мәртебесін арттыруға бағытталған.
Атап айтқанда, педагогтардың білім алушылар үшін жауапкершілігін тек оқу процесі кезеңімен шектеу; педагогтардан есептілікті қағаз және электрондық форматта қатар жүргізуді болдырмау; ата-аналардың балалардың өмірі, денсаулығы мен қауіпсіздігі үшін жауапкершілігін кеңейту; орта білім беру ұйымдарында ұялы байланыс құралдарын пайдалану бойынша бірыңғай қағидаларды бекіту ұсынылады.
Сонымен қатар, республика үкіметінің бастамасымен негізгі заң жобасында денсаулық сақтау нысандарын салу және пайдалану саласындағы мемлекеттік-жекешелік әріптестік жобалары бойынша конкурстық рәсімдерге қатысу үшін жекеменшік серіктестер мен концессионерлердің (еншілес компаниялардың) тізбесін кеңейту көзделген.
Бұдан бөлек, Қазақстан аумағында жетекші шетелдік жоғары оқу орындарының қызметін тиімді жүзеге асыруға және қолайлы жағдай жасауға бағытталған құқықтық реттеу енгізіледі.
Сондай-ақ депутаттар «Педагог мәртебесі мәселелері бойынша Қазақстан Республикасының Әкімшілік құқық бұзушылық туралы кодексіне өзгерістер енгізу туралы» ілеспе заң жобасын бірінші оқылымда мақұлдады. Талқылау барысында педагогтардың құқықтарын бұзғаны үшін жауапкершілікті күшейтуге бағытталған түзетулер аталған құжаттан алынып тасталды.
