Астана. 29 сәуір. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күнгі жалпы отырыста «Қазақстан Республикасының арнайы мемлекеттік органдарының қызметі мәселелері бойынша кейбір заңнамалық актілеріне өзгерістер мен толықтырулар енгізу туралы» заң жобасын, сондай-ақ оған ілеспе заң жобасын екінші оқылымда қабылдады.
Мәжіліс депутаты Олжас Куспеков құжаттардың 1 сәуірде бірінші оқылымда мақұлданғанын еске салды. Заң жобаларының негізгі мақсаты – Қазақстан Республикасының арнайы мемлекеттік органдарында қызмет өткеру саласындағы заңнаманы одан әрі жетілдіру.
«Заң жобасын қарау барысында депутаттар бірқатар түзетулер енгізді. Соның ішінде мемлекеттік құпияларға тек режимдік нысандарға ғана емес, сондай-ақ ерекше режимдегі және ерекше қорғалатын нысандарды салуға, жөндеуге және күтіп ұстауға бөлінетін қаражат пен нақты шығындар туралы мәліметтерді жатқызу ұсынылады», – деді Куспеков.
Сонымен қатар экстремистік және террористік материалдарды тасымалдауға тыйым салатын түзетулер енгізілді. Бұдан бөлек, терроризмге қарсы іс-қимыл және экстремизмнің алдын алу саласындағы мемлекеттік органдардың құзыреті салалық заңнамалар мен жаңадан қабылданған актілерге сәйкес нақтыланды.
Сондай-ақ құқықтық олқылықтарды жоюға және арнайы мемлекеттік органдарда қызмет өткеру мәселелері бойынша заңнаманы жетілдіруге бағытталған нормалар әзірленді. Атап айтқанда, уәкілетті басшының қызметтік тергеп-тексеру материалдарымен танысу құқығы регламенттелді.
Депутаттар екінші оқылымда қабылдаған «Қазақстан Республикасының арнайы мемлекеттік органдарының қызметі мәселелері бойынша Әкімшілік құқық бұзушылық туралы кодексіне өзгерістер мен толықтыру енгізу туралы» ілеспе заң жобасында экстремистік және террористік материалдарды дайындау, сақтау, әкелу, тасымалдау және тарату үшін бұрыннан көзделген жауапкершілікке қоса, оларды жариялау үшін әкімшілік жауапкершілік енгізу ұсынылды.
Бұдан басқа, салық заңнамасында көзделген жағдайларда бұрын әкімшілік жауапкершілікке тартылған тұлғаларды әкімшілік жазаны орындаудан босатуды қарастыратын түзету ұсынылды.
Заң жобалары Сенаттың қарауына жолданды.
