Брюссель. 29 сәуір. ИНТЕРФАКС – Еуропалық комиссия төрағасы Урсула фон дер Ляйен Украинаға 90 млрд еуро көлемінде берілетін несие аясындағы алғашқы транш ағымдағы тоқсанның соңына дейін аударылатынын растады.
Оның айтуынша, 45 млрд еуро көлеміндегі алғашқы транш 2026 жылға жоспарланып, осы тоқсанда бөлінеді. «Көктемде біз қандай жағдай болмасын 90 млрд еуро көлемінде несие беретінімізді мәлімдеген едік. Енді бұл уәдені орындап отырмыз. 2026 жылға арналған 45 млрд еуро көлеміндегі алғашқы траншты осы тоқсанда бөлеміз. Оның үштен бірі бюджеттік қажеттіліктерге, ал үштен екісі Украинаның қорғаныс саласына бағытталады», – деді фон дер Ляйен сәрсенбі күні Еуропарламент отырысында, Страсбург қаласында сөйлеген сөзінде.
Оның сөзінше, қорғанысқа арналған алғашқы пакет шамамен 6 млрд еуроға бағаланатын ұшқышсыз ұшу аппараттарын жеткізуге бағытталады.
Фон дер Ляйен Киевке қолдау жалғасатынын да атап өтті.
Еуропалық одақ кеңесі 23 сәуірде Украинаға 2026–2027 жылдары 90 млрд еуро көлемінде несие беру туралы шешім қабылдаған болатын. Кеңес хабарламасында бұл шешім Еуропалық комиссия үшін төлемдерді 2026 жылдың екінші тоқсанынан бастап жүзеге асыруға мүмкіндік беретіні көрсетілген.
