Астана. 29 сәуір. ИНТЕРФАКС-ҚАЗАҚСТАН – Парламент Мәжілісі сәрсенбі күнгі жалпы отырыста «Қазақстан Республикасының кейбір заңнамалық актілеріне атқарушылық іс жүргізуді жетілдіру мәселелері бойынша өзгерістер мен толықтырулар енгізу туралы» заң жобасын бірінші оқылымда мақұлдады.
«Біз өндіріп алудың шекті мөлшерін 20-дан 40 айлық есептік көрсеткішке дейін ұлғайту арқылы жеңілдетілген өндіріп алу тәртібін кеңейтіп отырмыз. Бұл азаматтарға қосымша шығындардан құтылуға мүмкіндік береді», – деді заң жобасын таныстырған Мәжіліс депутаты Дмитрий Колода.
Мәжілістің заңнама және сот-құқықтық реформа комитетінің қорытындысына сәйкес, жеңілдетілген тәртіпті кеңейту жекелеген атқарушылық құжаттар санаттары бойынша (айыппұлдар мен салық берешектерін өндіріп алу) көзделген. Сонымен қатар Әлеуметтік кодекске сәйкес мүгедектігі бар адамдарға төленетін мемлекеттік жәрдемақылардан және өзге де әлеуметтік төлемдерден өндіріп алу мөлшерін 25%-дан асырмау қарастырылған.
Колоданың айтуынша, құжатта сот орындаушыларына борышкерлерді тұрғын үйден шығару туралы 10 күн бұрын хабарлау міндеті енгізіледі. Бұл оларға алдын ала дайындалып, басқа баспана табуға мүмкіндік береді.
Сондай-ақ, мәжбүрлеп орындату шараларын қолдану мерзімі өтіп кеткен жағдайда оларды толықтай тоқтату нормасы енгізіледі.
Бұдан бөлек, іс жүргізуді аяқтаған сот орындаушысы барлық тыйым салуларды, оның ішінде басқа орындаушылар салған шектеулерді де өз бетінше алып тастай алады.
«Баламен қарым-қатынас тәртібі туралы атқарушылық құжаттар бойынша борышкерлер атқарушылық іс жүргізу қозғалған сәттен бастап Бірыңғай борышкерлер тізіліміне енгізілмейді. Қазіргі уақытта мұндай борышкерлер іс қозғалғаннан кейін автоматты түрде тізілімге енгізіледі», – деді Колода.
Сонымен қатар, қолданыстағы жеке сот орындаушыларына заңнаманы және кәсіби әдеп кодексін білу деңгейін тексеруді қамтитын аттестаттау енгізіледі. Қайта аттестаттаудан өтпеген жағдайда жеке сот орындаушысының лицензиясы тоқтатылады.
Депутаттың айтуынша, көмекшілер мен тағылымдамадан өтушілерге қойылатын талаптар да күшейтіледі. Соңғы үш жыл ішінде сыбайлас жемқорлық құқық бұзушылықтары үшін жауапкершілікке тартылған тұлғалар жеке сот орындаушысының көмекшісі немесе тағылымдамадан өтуші бола алмайды.
«Жеке сот орындаушыларының қызметін бақылау бойынша әділет органдарының өкілеттіктері кеңейтіледі. Тексеру нәтижелері бойынша заң бұзушылықтарды жою туралы ұсынымдар енгізіледі, ал оларды қараусыз қалдыру лицензияның қолданылуын тоқтата тұруға негіз болады», – деп толықтырды Колода.
Жоспарлы және жоспардан тыс бақылау аясында әділет органдары мен жеке сот орындаушылары палаталары жеке сот орындаушыларының шоттары бойынша банктік үзінді көшірмелерді талап ету құқығына ие болады.
«Қазіргі уақытта олар банктік құпияға сілтеме жасап, мұндай ақпаратты беруден бас тартады», – деп түсіндірді Колода.
Қазақстанда 1 айлық есептік көрсеткіш 4325 теңгені құрайды. 29 сәуірдегі ресми бағам – 1 АҚШ доллары үшін 457,21 теңге.
