ҚР Көлік министрлігі хабарлайды: «Көлік-логистика саласына жасанды интеллектіні енгізу процестерді оңтайландыруға, шығындарды азайтуға және еліміздің транзиттік әлеуетін арттыруға бағытталған. Үкімет отырысында Көлік министрі Нұрлан Сауранбаев цифрлық жобалардың іске асырылу барысы туралы баяндады. Саланы трансформациялаудың негізгі құралы ретінде мемлекеттік органдар мен бизнестің басын қосқан Smart Cargo платформасы айқындалды. Жүйе QR-кодтар арқылы жүк туралы мәліметтерге қол жеткізуге, құжаттарды автоматты түрде тексеруге, маршруттарды әзірлеуге және қажетті рұқсат қағаздарын анықтауға мүмкіндік береді. Бұл тетік шекарадан өту уақытын 4 сағаттан 30 минутқа дейін қысқартады деп күтілуде. Цифрландыру процесі теміржол секторын да қамтып, онда 10-ға жуық жоба жүзеге асырылуда. (…) «Қазіргі уақытта «е-Көлік» біртұтас зияткерлік көлік жүйесі қалыптасып жатыр. QazTech базасында құрылатын бұл платформа көліктің барлық түрін біріктіреді. Ол деректерді жинап, өңдеуге, көлік ағындарын болжауға және шешімдерді автоматты түрде қабылдауға мүмкіндік береді. Әлемдік сарапшылардың пайымдауынша, көлік саласы — деректердің ең ірі көздерінің бірі. Осыған байланысты жасанды интеллект ақпаратты өңдеудің негізгі құралына айналып отыр. «Е-Көлік» жүйесі саланы озық басқаруға жол ашады», — деп атап өтті министр».
Еуразия24 пікірі:
Көлік министрлігі жоспарланған бастамаларды толық іске асырса, логистика саласындағы белгісіздік мәселесі шешімін таппақ. Өйткені тасымал кезіндегі іркілістер мен тасымалдаушылардың шығыны жеткізу мерзімінің тұрақсыздығына және келісімшарттардың бұзылуына басты себеп болып отыр. Кез келген бизнес үшін бұл жайттар бағыт таңдау кезінде шешуші рөл атқарады. Қазақстан өзін транзиттік хаб ретінде танытты, сондықтан мұндай цифрлық шешімдер «жылдам» жолдар мен шекаралар туралы мәлімдемелерге толық сәйкес келеді. Бұл еліміздің Қытай мен Еуропа арасындағы бағыттарда бәсекеге қабілеттілігін арттыра түседі. Логистиканы цифрландыру — жаңа идея емес. Дегенмен, құжат рәсімдеу жылдамдығы мен цифрлық шешімдер бойынша әлемдік көшбасшылар саналатын Сингапур мен Қытайдың тәжірибесі Қазақстан үкіметіне жоспарды тек қағаз бетінде қалдырмай, жүйелі түрде іске асыруға серпін беріп отыр.
