Астана. 18 ақпан. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев жұмыс сапарымен АҚШ-қа барады. Бұл туралы Мемлекет басшысының баспасөз қызметі хабарлады.
«18–19 ақпан күндері Мемлекет басшысы Қасым-Жомарт Тоқаев АҚШ президенті Дональд Трамптың шақыруымен Бейбітшілік кеңесінің алғашқы отырысына қатысу үшін Вашингтонға жұмыс сапарымен барады», — делінген сәрсенбі күні таратылған хабарламада.
Баспасөз қызметінің мәліметінше, саммит барысында негізгі назар Газа секторындағы жағдайды тұрақтандыру мәселелеріне, сондай-ақ өңірде бейбітшілік пен қауіпсіздікті қамтамасыз ету және тұрақты гуманитарлық қолдауды жолға қоюға бағытталған нақты қадамдарды әзірлеуге аударылады.
Сапар аясында Тоқаев ірі америкалық компаниялардың басшыларымен бірқатар кездесу өткізеді.
Әлемнің шамамен 60 мемлекетінің көшбасшылары Бейбітшілік кеңесіне қатысуға шақырту алған, олардың бір бөлігі ұйымның құрылтайшы мүшелері ретінде тіркелген. Кеңестің алғашқы төрағасы болып Дональд Трамп сайланды.
Қазақстан АҚШ президентінің бастамасымен құрылған Бейбітшілік кеңесіне биыл қаңтар айында Швейцарияның Давос қаласында құрылтайшы мемлекет ретінде қосылған болатын.
Бейбітшілік кеңесін құру Трамп ұсынған Газа секторындағы қақтығысты тоқтатуға бағытталған жоспардың бір бөлігі ретінде қарастырылған.
