Астана. 28 мамыр. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күнгі пленарлық отырыста сыбайлас жемқорлыққа қарсы іс-қимыл саласындағы заңдарды екі оқылымда қарап, мақұлдады.
Атап айтқанда, бұған дейін Мәжіліс қабылдаған «Сыбайлас жемқорлыққа қарсы іс-қимыл мәселелері бойынша кейбір заңнамалық актілерге өзгерістер мен толықтырулар енгізу туралы» және онымен байланысты «Сыбайлас жемқорлыққа қарсы іс-қимыл мәселелері бойынша Қылмыстық кодекске, Қылмыстық-процестік кодекске және Әкімшілік құқық бұзушылық туралы кодекске өзгерістер мен толықтырулар енгізу туралы» заңдар мақұлданды.
Екі құжат та Президенттің қол қоюына жолданады.
«Қаралып отырған заңдардың мақсаты – 2022–2026 жылдарға арналған сыбайлас жемқорлыққа қарсы саясат тұжырымдамасын іске асыру, сыбайлас жемқорлықтың алдын алу тетіктерін жетілдіру, превентивтік шараларды күшейту және халықаралық антикоррупциялық стандарттарды енгізу», – деді сенатор Андрей Лукин отырыс барысында.
Оның айтуынша, түзетулер мүдделер қақтығысының алдын алу және оны реттеу тетіктерін енгізуді, жеке мүдделерді декларациялау міндетін, сондай-ақ мүдделер қақтығысының алдын алу шараларын қабылдамағаны үшін жауапкершілікті көздейді.
Атап айтқанда, мемлекеттік қызметшілер мен оларға теңестірілген тұлғаларға қызметтік өкілеттіктерін жеке мүдделеріне пайдалануға тыйым салынады.
Сонымен қатар мемлекеттік функцияларды орындауға уәкілетті тұлғаларға теңестірілетін адамдар тізімі кеңейтіледі, жақын туыстардың бірлесіп қызмет атқаруына қатысты шектеулер күшейтіледі және ішкі сыбайлас жемқорлыққа қарсы бақылау тетіктері жаңғыртылады.
Мәселен, бір ведомствода басшының жиендері, жезделері, қайындары, абысын-ажын туыстары мен күйеу балаларының бірге жұмыс істеуіне тыйым салынады.
Заңда пара алу мен пара беруге ғана емес, сондай-ақ пара беруге уәде ету, ұсыну немесе талап ету әрекеттеріне де қылмыстық жауапкершілік енгізіледі.
Сондай-ақ жеке тұлғаларға қатысты әкімшілік сыбайлас жемқорлық құқық бұзушылықтары бойынша ескіру мерзімі бір жылдан үш жылға дейін ұлғайтылады.
«Бұдан бөлек, мүдделер қақтығысын реттеу шараларын қабылдамау, сыбайлас жемқорлық қылмыстары туралы хабарламау және заңсыз материалдық сыйақы беру сияқты жекелеген құқық бұзушылықтар үшін әкімшілік жауапкершілік күшейтіледі. Заңдарды қабылдаудан күтілетін нәтиже – сыбайлас жемқорлық құқық бұзушылықтарының алдын алу, анықтау және жолын кесу тиімділігін арттыру, сыбайлас жемқорлыққа қарсы іс-қимыл тетіктерін жетілдіру, сондай-ақ мемлекеттік органдар мен квазимемлекеттік сектор субъектілерінің қызметіндегі ашықтықты күшейту», – деді.
