Астана. 6 қаңтар. ИНТЕРФАКС-ҚАЗАҚСТАН – Қазақстан алдағы жылдары Жерді қашықтан зондтау спутниктерін 75 млн АҚШ долларына экспорттауды жоспарлап отыр. Бұл туралы Қазақстан Республикасы Премьер-министрінің орынбасары – жасанды интеллект және цифрлық даму министрі Жаслан Мәдиев мәлімдеді.
«Жасанды интеллект министрлігінің қарамағында отандық спутниктерді өндіруге арналған кешен бар. Қазіргі уақытта аталған кәсіпорынның өндірістік қуаттарын толық жүктеу бағытында белсенді жұмыс жүргізілуде. Алдағы жылдары бұл жерде кемінде 5–6 Жерді қашықтан зондтау спутнигі шығарылады. Соның ішінде экспорт көлемі 75 млн АҚШ долларын құрайды», – деді Мәдиев сейсенбі күні өткен Үкімет отырысында.
Ол Қазақстан тарихында алғаш рет жоғары технологиялық өнім – спутниктер экспорты жүзеге асатынын атап өтті.
Вице-премьердің таныстырылымында 2024–2025 жылдары Қазақстанда өндірілген Жерді қашықтан зондтау спутниктерін Моңғолия, Конго және Нигерия елдеріне жеткізуге арналған экспорттық келісімшарттар жасалғаны көрсетілген.
Технологиялық экспорттың негізгі мақсаты – Made in Qazaqstan белгісімен халықаралық спутниктік топтаманы қалыптастыру.
