Астана. 20 тамыз. ИНТЕРФАКС-ҚАЗАҚСТАН – Қазақстанда «Келешек мектептері» ұлттық жобасы аяқталды. Жоба аясында 460 мың оқушы орнына есептелген 217 жаңа мектеп бой көтерді, деп хабарлады Үкіметтің баспасөз қызметі.
«Үш жыл ішінде жоба аясында жаңа үлгідегі 217 мектеп салынды. Олар жалпы 460 мың оқушыға арналған. 2024 жылы 105, 2025 жылы 112 мектеп пайдалануға берілді. Соның нәтижесінде үш ауысымда жұмыс істеген 54 және апатты жағдайдағы 12 мектептің мәселесі толық шешілді. Сондай-ақ 100-ден астам мектепте орын тапшылығы азайды», – делінген Үкіметтің бейсенбі күні таратқан хабарламасында.
Жаңа мектептердің едәуір бөлігі Астана, Алматы және Шымкент қалаларында, сондай-ақ Алматы, Түркістан, Маңғыстау және Қызылорда облыстарында салынды.
Ауылдық жерлерде жаңа үлгідегі 84 мектеп бой көтерді. Соның арқасында 130 мыңнан астам ауыл баласына заманауи білім беру инфрақұрылымы қолжетімді болды.
Үкімет мәліметінше, жаңа мектептердің аумағы бұған дейінгі типтік жобалармен салыстырғанда орта есеппен 15–20% кең. Ал техникалық жабдықталу деңгейі төрт еседен астам жоғары.
Мектептерде физика, химия және биология кабинеттері, зертханалар, компьютерлік сыныптар, STEM-зертханалар мен робототехника кабинеттері қарастырылған. Сонымен қатар әмбебап шеберханалар, шығармашылық студиялар және бастапқы кәсіптік даярлық кабинеттері жабдықталған.
Президент Қасым-Жомарт Тоқаевтың тапсырмасымен жүзеге асырылған «Келешек мектептері» ұлттық жобасы сапалы білім алуға тең мүмкіндік жасауға, оқушы орнының тапшылығын азайтуға, үш ауысымды оқыту мен апатты жағдайдағы мектептер мәселесін шешуге бағытталған.
