Мәскеу. 24 тамыз. ИНТЕРФАКС – Сингапур билігі бала туу көрсеткішін арттыруға бағытталған жаңа шаралар ұсынды. Бағдарлама аясында әр балаға 55 мың доллардан астам қаржылай қолдау қарастырылған.
Financial Times мәліметінше, Сингапурда бала туу деңгейі жылдан-жылға төмендеп келеді. Соның салдарынан қала-мемлекет халқы ең жылдам қартайып жатқан елдердің қатарына кірді.
Премьер-министр Лоуренс Вонг жексенбі күні жыл сайынғы жолдауында балаға берілетін төлемдер мен бала күтіміне байланысты демалыс жүйесі қайта қаралатынын мәлімдеді. Оның айтуынша, үкімет балалы болуды жоспарлаған азаматтарға отбасын құрып, бала тәрбиелеуге қолайлы жағдай жасауды көздейді.
Сингапур халқының саны 6 миллионнан сәл асады. 2025 жылы елде бір әйелге шаққандағы бала саны 0,87-ге дейін төмендеп, бұрын-соңды болмаған ең төменгі көрсеткіш тіркелді. 2024 жылы бұл көрсеткіш 0,97 болған. Ал әлемдегі ең төмен көрсеткіш Оңтүстік Кореяда тіркелген – бір әйелге 0,8 бала.
Демографтардың есебінше, көші-қонды есепке алмағанда, халық саны азаймауы үшін бір әйелге орта есеппен 2,1 баладан келуі қажет.
Бала туу деңгейінің төмендеуі мен өмір сүру ұзақтығының артуы Сингапурдағы халықтың жас құрамына айтарлықтай әсер етіп отыр. БҰҰ өлшемі бойынша, 65 жастан асқан тұрғындардың үлесі 21%-дан жоғары ел «аса қартайған» қоғам санатына жатады. Сингапур биыл осы деңгейге жетуі мүмкін. 2030 жылға қарай елдегі әрбір төртінші адамның жасы 65-тен асады деген болжам бар.
«Әрбір отбасы мынаны білгенін қалаймыз: егер балалы болуды шешсеңіздер, мемлекет сіздерді қолдайды. Біз көмектің көлемін арттырып, оны бұрынғыдан да ұзақ уақыт көрсетеміз», – деді Вонг.
Премьер-министрдің айтуынша, мемлекет әр балаға 17 жасқа толғанға дейін шамамен 70 мың сингапур долларын, яғни 55,15 мың АҚШ долларын тікелей қаржылай көмек ретінде бөледі. Оның ішінде бала дүниеге келген кезде 10 мың доллар беріледі, тағы 10 мың доллар кейін оның білім алуына жұмсалады.
Бала күтіміне байланысты берілетін қолдау да кеңейтіледі. Әсіресе көпбалалы отбасыларға көбірек мүмкіндік қарастырылып, жұмыс берушілердің осыған байланысты шығындарының негізгі бөлігін мемлекет өтейді. Сонымен қатар балалы отбасылардың алғашқы баспанасын сатып алуына қолайлы жағдай жасалмақ.
«Отбасыларды қолдау үшін қанша шара қабылдасақ та, жағдайды шынайы бағалауымыз керек. Бала туу көрсеткіші халықтың табиғи өсімін қамтамасыз ететін деңгейден әлі де едәуір төмен болуы ықтимал. Егер халық саны тек табиғи өсімге тәуелді болса, ел тұрғындарының саны азая берер еді», – деді Вонг.
Осыған байланысты Сингапур халық санының кемуін көші-қон есебінен толықтыру саясатын жалғастырады. Премьер-министрдің айтуынша, шетелден келетін адамдардың саны біртіндеп әрі бақылауда ұсталады. Бұл ел тұрғындарының басым бөлігін алдағы уақытта да сингапурлықтар құрауы үшін қажет.
