Астана. 28 қараша. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев аудан әкімдерін сайлау жүйесінің артықшылықтары мен кемшіліктерін мұқият зерделеу қажет екенін мәлімдеді.
«Аудан әкімдерін сайлау мәселесіне қатысты түрлі пікірлер бар. Бірқатар қоғам белсенділері мен азаматтар аудан әкімдерін сайлау қажеттілігін қайта қарауды ұсынып отыр. Бұл мәселені Ерлан Саиров, Альберт Рау және Мархабат Жайымбетов бастаған депутаттар да көтерді. Олар елімізде сайлау тым жиі өтіп жатқанын, халықтың саяси науқандардан шаршай бастағанын атап көрсетеді. Бұл көзқарасты ауылдар мен аудандардың тұрғындары да қолдайды. Сондай-ақ кейбір пікірлерге сәйкес, сайлау науқандары жергілікті жерлердегі нақты жұмыстарға кедергі келтіруі мүмкін. Бұл ұстанымды да ескеру керек», – деді президент жұма күні ауыл әкімдерінің форумында сөйлеген сөзінде.
Мемлекет басшысының айтуынша, қазіргі уақытта 52 аудан әкімі сайлау жолымен тағайындалған. «Енді олардың жұмысының нәтижелерін талдау қажет. Аудан әкімдерін сайлау жүйесінің артықшылықтары мен кемшіліктерін жан-жақты таразылау керек. Мұндағы мәселе әкімдерді міндетті түрде сайлау емес, ең бастысы – нақты нәтижеге қол жеткізу», – деп атап өтті Тоқаев.
Сондай-ақ ол Үкімет пен Парламент депутаттары бұл мәселені кешенді қарастырып, әділ әрі дұрыс шешім қабылдауы тиіс екенін айтты. «Ең бастысы – кез келген реформа байыппен жүргізілуі керек», – деді Президент.
