АСТАНА. 28 қараша. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаевтың айтуынша, елде құрылатын жаңа бір палаталы парламентке барлық депутаттар бірыңғай тәртіппен сайланады, ал президенттік квота алынып тасталады.
«Парламенттік реформа – бұл екі палатаны механикалық біріктіру ғана емес. Депутаттар санын шамадан тыс көбейту орынсыз деп санаймын. Керісінше, парламент жұмысы оңтайландырылып, жетілдірілуі керек. Жаңа бір палаталы парламентте президенттік квота болмайды – барлық депутаттар бірыңғай тәртіппен сайлануы тиіс. Бұл – алдағы парламенттік реформаның аясындағы өте маңызды қадам. Осы шараларды қоғамға жан-жақты түсіндіру қажет», – деді Тоқаев жұма күні ауыл әкімдерінің форумында сөйлеген сөзінде.
Бір палаталы парламент құру бастамасын Қасым-Жомарт Тоқаев биыл қыркүйекте Қазақстан халқына арнаған Жолдауында ұсынған болатын.
«Бұл алдыңғы саяси реформалардың қисынды жалғасы деуге болады. Осылайша, президенттік басқару формасын сақтай отырып, “Күшті Президент – ықпалды Парламент – есеп беретін Үкімет” қағидатын нығайтып жатырмыз», – деді мемлекет басшысы.
Президенттің айтуынша, жаңа бастама қоғамда кеңінен талқылануда. Парламенттің құрылымы бойынша көптеген ұсыныстар келіп түсуде. Атап айтқанда, депутаттарды халық санына пропорционалды түрде сайлау жөнінде идеялар айтылуда. Алайда бұл тәсіл қабылданса, депутаттар саны 200 адамға дейін жетуі мүмкін, ал қазіргі таңда екі палатада 148 депутат бар.
Қазақстанның қазіргі парламенті 1995 жылдан бері екі палатадан – Сенат пен Мәжілістен тұрады.
