АСТАНА. 11 қазан. ИНТЕРФАКС-ҚАЗАҚСТАН – Мемлекет басшысы Қасым-Жомарт Тоқаев сенбі күні “Таза Қазақстан” экологиялық акциясына қатысты, деп хабарлады Президент баспасөз қызметі.
“Президент елордалық Ботаникалық бақ аумағында еріктілер мен экологиялық белсенділермен бірге ағаш отырғызу жұмыстарына қатысты”, – делінген хабарламада.
Баспасөз қызметінің мәліметінше, биылғы жалпыұлттық акция аясында еліміз бойынша шамамен 2,4 миллион көшет отырғызылған.
“Таза Қазақстан” – Мемлекет басшысының 2024 жылы бастамашылық етуімен қолға алынған ұлттық экологиялық жоба. Оның мақсаты – қоршаған ортаны қорғау, сондай-ақ қоғамда табиғатқа деген жауапкершілік мәдениетін қалыптастыру. Жоба тек көгалдандырумен шектелмей, аумақтарды тазарту, су айдындары мен табиғи ескерткіштерді қорғау іс-шараларын да қамтиды.
