АСТАНА. 26 қыркүйек. ИНТЕРФАКС-ҚАЗАҚСТАН – Қазақстан азаматтардың әл-ауқатын арттыру және елдің жаһандық бәсекеге қабілеттілігін нығайтуға бағытталған реформалар жолын жалғастырып келеді. Бұл туралы Мемлекет басшысы Қасым-Жомарт Тоқаев Ғылым және технология жөніндегі ұлттық кеңестің отырысында мәлімдеді.
«Қиын-қыстау кезеңге қарамастан, біз дұрыс бағытпен келе жатырмыз. Еліміз барлық қиындықтарға төтеп беріп, алға нық қадам жасауда», – деді Президент.
Мемлекет басшысы соңғы бес жыл ішінде елдің ішкі жалпы өнімі (ЖІӨ) 181 миллиард доллардан 291 миллиард долларға дейін өскенін, ал биылғы сегіз айда экономиканың өсімі 6,5%-ды құрағанын атап өтті. Сондай-ақ халықаралық резервтер мен Ұлттық қордың активтері 116 миллиард доллардан асқан. «Standard & Poor’s» агенттігі Қазақстанның кредиттік рейтингі бойынша болжамын «тұрақтыдан» «оң» деңгейге өзгерткен.
«Бүкіл әлем елдері мен беделді халықаралық ұйымдар осы жетістіктерімізді мойындап отыр. Қарапайым тілмен айтқанда, сырт көз – сыншы. Қазақстанға халықаралық қауымдастықтың сенім білдіруі – еліміздің дұрыс бағытта дамып келе жатқанының айқын көрінісі. Алайда халықаралық рейтингтердегі жоғары орындар – біздің мақсатымыз емес және ол үшін босаңсуға да болмайды», – деді Қасым-Жомарт Тоқаев.
Президенттің айтуынша, мемлекеттің басты мақсаты – халықтың әл-ауқатын тұрақты түрде жақсарту және еліміздің жаһандық деңгейдегі бәсекеге қабілеттілігін арттыру.
