Астана. 6 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Нұрсұлтан Назарбаевты туған күнімен құттықтап, жеделхат жолдады. Бұл туралы дүйсенбі күні Ақорданың баспасөз қызметі хабарлады.
Құттықтау жеделхатында Мемлекет басшысы Тұңғыш Президент Нұрсұлтан Назарбаевтың қазіргі Қазақстан мемлекеттілігінің негізін қалаудағы, Қазақстан Республикасын құрудағы, елдің экономикалық әлеуетін нығайтудағы және халықаралық аренадағы беделін арттырудағы тарихи рөлін атап өтті.
Сондай-ақ құттықтауда елорданы Астанаға көшіру туралы шешімнің тарихи маңызына ерекше назар аударылған.
«Елорданың Сарыарқаның сайын даласына көшірілуі бүкіл Қазақстанның дамуына қуатты серпін берді. Бүгінде Астана қарқынды дамып, келбеті жаңарып, әлемдегі ең көрікті қалалардың біріне айналып келеді», – делінген құттықтау мәтінінде.
Президент Нұрсұлтан Назарбаевқа зор денсаулық, ұзақ ғұмыр және бақ-береке тіледі.
Қазақстанның Тұңғыш Президенті Нұрсұлтан Назарбаев 6 шілдеде 86 жасқа толды. Оның бастамасымен 1997 жылғы желтоқсанда Қазақстан астанасы Алматыдан Ақмолаға көшірілді. 1998 жылғы мамырда қала атауы Астана болып өзгертілді. 2019 жылғы наурызда елорда Нұр-Сұлтан деп аталып, 2022 жылғы қыркүйекте оған қайтадан Астана атауы қайтарылды.
