Астана. 6 шілде. ИНТЕРФАКС-ҚАЗАҚСТАН – «Ауыл» халықтық-демократиялық патриоттық партиясы дүйсенбі күні Астанада өткен съезінде Құрылтай депутаттығына үміткерлердің 69 адамнан тұратын партиялық тізімін бекітті. Бұл туралы «Интерфакс-Қазақстан» агенттігінің тілшісі хабарлады.
Партия төрағасы Қайрат Айтуғановтың айтуынша, тізімге 49 ер адам мен 20 әйел енгізілген. Сонымен қатар үміткерлер қатарында 10 жас белсенді және мүгедектігі бар алты азамат бар.
Партиялық тізімге партия төрағасы Қайрат Айтуғанов, партияның бұрынғы жетекшісі әрі Мәжіліс депутаты Серік Егізбаев, VIII шақырылым Мәжілісінің депутаттары және партия атынан президенттікке бұрын ұсынылған Қарақат Әбден мен Жигули Дайрабаев та енгізілді. Сондай-ақ тізімде агробизнес өкілдері, фермерлер, өңірлік партия ұйымдарының жетекшілері мен қоғам қайраткерлері бар.
Бұрынғы қос палаталы Парламентте партияның Мәжілістегі фракциясы сегіз депутаттан тұрған болатын.
Бұған дейін Құрылтай сайлауына қатысатынын Respublica және «Ақ жол» демократиялық партиялары да мәлімдеп, тиісінше 76 және 63 кандидаттан тұратын партиялық тізімдерін бекіткен еді.
Қазақстанда Құрылтай сайлауы 23 тамызға белгіленген. Заң шығару өкілеттігін жүзеге асыратын жоғары өкілді орган – Құрылтай алғаш рет сайланбақ. Бұған дейін елде Мәжіліс пен Сенаттан тұратын қос палаталы Парламент жұмыс істеді.
Құрылтай 145 депутаттан құралады. Олар бірыңғай жалпыұлттық сайлау округі бойынша пропорционалды жүйемен, яғни партиялық тізімдер негізінде сайланады. Депутаттар жалпыға бірдей, тең және тікелей сайлау құқығы негізінде жасырын дауыс беру арқылы бес жыл мерзімге сайланады. Құрылтайдан орын алу үшін саяси партиялар бірыңғай жалпыұлттық сайлау округі бойынша берілген дауыстың кемінде 5 пайызын жинауы тиіс.
Қазіргі уақытта Қазақстанда жеті саяси партия тіркелген. Олар: жуырда құрылған «Әділет» партиясы (оған маусым айының ортасында қайта ұйымдастыру арқылы биліктегі Amanat партиясы қосылды), «Ақ жол» демократиялық партиясы, Қазақстанның халық партиясы, «Ауыл» халықтық-демократиялық патриоттық партиясы, Жалпыұлттық социал-демократиялық партия, «Байтақ» жасылдар партиясы және Respublica партиясы. Бұрынғы қос палаталы Парламентте алты саяси партияның өкілдігі болды.
