Астана. 10 қараша. ИНТЕРФАКС-ҚАЗАҚСТАН. Қазақстан Президенті Қасым-Жомарт Тоқаев Ресей Федерациясы Үкіметі Төрағасының бірінші орынбасары Денис Мантуровты қабылдап, осы аптада Мәскеуге жоспарланған сапарына дайындық мәселесін талқылады, деп хабарлайды Мемлекет басшысының баспасөз қызметі.
Мемлекет басшысы алдағы сапардың маңыздылығын атап өтіп, келіссөздердің табысты өтетініне сенім білдірді.
Тоқаев Ресей Президентімен екіжақты сауда айналымының көлемін жақын болашақта $30 млрд-қа жеткізу жөнінде қол жеткізілген уағдаластықты еске салды. Оның айтуынша, Ресей Қазақстан экономикасына инвестиция салу көлемі бойынша көшбасшы елдердің бірі болып табылады – тек 2024 жылдың өзінде инвестиция көлемі $4 млрд-қа жеткен.
Президент сондай-ақ Қазақстанда бірқатар ірі ресейлік компаниялардың табысты жұмыс істеп жатқанын атап өтті, бұл екі ел арасындағы өзара сенім деңгейінің жоғары екенін көрсетеді.
Өз кезегінде Денис Мантуров жылы қабылдау үшін алғысын білдіріп, Ресей тарапының ынтымақтастықты одан әрі тереңдетуге дайын екенін растады. Ол екі ел арасында бірлескен жобаларды іске асыруға берік негіз қалыптасқанын атап өтті.
Кездесу қорытындысы бойынша Мемлекет басшысы Қазақстан мен Ресей халықтары арасындағы достықты нығайтуға, сондай-ақ әлеуметтік-экономикалық және мәдени байланыстарды дамытуға қосқан елеулі үлесі үшін Денис Мантуровты І дәрежелі «Достық» орденімен марапаттады.
Еске сала кетейік, Қасым-Жомарт Тоқаев 12 қарашада Ресейге мемлекеттік сапармен баруды жоспарлап отыр. Сапар аясында бірқатар маңызды құжаттарға қол қойылады.
