Астана. 9 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ұлттық банк төрағасы Тимур Сүлейменовтің экономиканың, қаржы жүйесінің жағдайы және жүзеге асырылып жатқан ақша-кредит саясатының негізгі бағыттары туралы есебін тыңдады. Бұл туралы мемлекет басшысының баспасөз қызметі хабарлады.
Хабарламада атап өтілгендей, Президент Ұлттық банктің алдағы қызметіне қатысты бірқатар міндет жүктеп, инфляцияны төмендетудің, қаржы нарығының тұрақты жұмыс істеуін қамтамасыз етудің, сондай-ақ секторды цифрлық трансформациялаудың маңыздылығына ерекше назар аударды.
Өз кезегінде Тимур Сүлейменов Ұлттық банк баға тұрақтылығын қамтамасыз ету және орта мерзімді кезеңде инфляцияны 5% деңгейіне жеткізу жөніндегі мақсатқа қол жеткізу үшін барлық қажетті шараларды қабылдап жатқанын мәлімдеді.
Бұған дейін хабарланғандай, Қазақстанда жылдық инфляция деңгейі қазан айындағы 12,6%-дан 12,4%-ға дейін төмендеді.
