Астана. 9 желтоқсан. ИНТЕРФАКС-ҚАЗАҚСТАН – Елдің авиациялық билігі Петропавл – Ақтау бағыты бойынша әуе рейсін іске қосу мүмкіндігін пысықтап жатыр. Бұл туралы Көлік министрі Нұрлан Сауранбаев мәлімдеді.
«Елімізде шамамен 821 ішкі рейс бар. Көлік министрлігі ретінде біз әрбір өңірдің Алматы мен Астанамен әуе қатынасын қамтамасыз етуге тиіспіз. Бұл міндет толық орындалып отыр. (…) Ел аумағының ауқымын ескерсек, облыстар арасындағы әуе байланысы да жоғары деңгейде болуы қажет. Қазіргі уақытта біз Петропавл мен Ақтау арасында тікелей әуе қатынасын жолға қою мүмкіндігін қарастырып жатырмыз», – деді Нұрлан Сауранбаев сейсенбі күні өткен баспасөз мәслихатында.
Министрдің түсіндіруінше, жаңа ішкі бағыттарды ашу мәселесі әдетте субсидиялардың жеткіліксіздігімен және бос әуе кемелерінің шектеулі болуымен байланысты.
«Өңірлер арасындағы рейстер туралы сөз болғанда (…) олардың барлығы билеттердің қолжетімді болуын қалайды. Бұл қосымша шамамен 400 млн теңге көлемінде дотация бөлуді талап етеді (…) республикалық немесе жергілікті бюджеттен. Екінші мәселе – қандай әуе кемелерімен қамтамасыз ету. Сондықтан өңірлер бізге өтінішпен келгенде, біз “мәселе жоқ, іске асырайық” дейміз. Алайда қолда бар субсидия көлемі шектеулі: республикалық бюджеттен бар болғаны 6 млрд теңге ғана қарастырылған. Сол себепті жаңа бағыттардың ашылуы осы екі факторға тіреліп отыр», – деп атап өтті министр.
Өз кезегінде Көлік вице-министрі Талғат Ластаев бұқаралық ақпарат құралдарында жарияланған Астана мен Бурабай курорты арасындағы әуе рейстерін іске қосу жөніндегі ақпаратқа түсініктеме берді. Оның айтуынша, бұл бастама тапсырыспен орындалатын чартерлік рейстерге қатысты.
«Иә, мұндай мәлімдеме болды, мен оны баспасөзден көрдім. Әңгіме тапсырыстық, чартерлік бағыттар туралы. Бұл – шағын әуе кемелері, олар Астана мен Бурабай курорты арасында қатынауы мүмкін, осылайша жолаушылардың ұшақпен ыңғайлы әрі жылдам жетуіне мүмкіндік туады. Жалпы, мұндай мүмкіндік бар, институционалдық тұрғыда кедергілер жоқ. Әуе паркі кеңейіп келеді, сондықтан болашақта мұндай бағыттар да көбейеді деп ойлаймын», – деді ол.
