Рим. 29 қазан. ИНТЕРФАКС – Парламент сайлауының қорытындысы бойынша оппозиция жетекшісіне айналған Сербияның бұрынғы президенті Александр Вучич сайлауда жеңіске жеткен «Студенттер тізімінің» өкілдерін күш қолданды, саяси қарсыластарын қорқытып-үркітті және бұқаралық ақпарат құралдарына қысым жасады деп айыптады.
«Біз салмақты саяси ұйым ретінде сайлау нәтижелерін мойындап, қарсыластарымызды құттықтадық. Ақылға қонымды шешім қабылдай алатын, жауапкершілігі бар адамдар үшін осының өзі жеткілікті деп ойладық. Жеңістерін тойласын. Алайда оның орнына соңғы 72 сағат ішінде ашық террорға, соның ішінде өздері «БАҚ-ты азат ету» деп атаған әрекеттерге куә болдық», – деді Вучич бейсенбі күні Сербия прогрессивті партиясының штаб-пәтерінде өткен баспасөз мәслихатында. Оның сөздерін сербиялық «Политика» газеті жариялады.
Ол сондай-ақ Сербияның бірқатар қаласында «Студенттер тізімінің» саяси қарсыластарына күш қолданылғанын еске салды.
Вучичтің айтуынша, Сербия прогрессивті партиясы өткен парламент сайлауының қорытындысынан тиісті сабақ алды. Ол партияда өзгерістер болатынын, ал Скупщинада (Сербия парламенті) «Сербия террорға қарсы» блогы құрылатынын атап өтті.
Бұған дейін «Студенттер тізімінің» өкілдері, атап айтқанда, РТС мемлекеттік телерадиокомпаниясы басшылығының дереу отставкаға кетуін талап еткені хабарланған болатын. РТС бас директоры Маня Грчич бейсенбі күні қызметінен кететіні туралы ашық хат жариялады. Сонымен қатар осы аптаның басында «ТВ Информер» телеарнасына шабуыл жасалғаны хабарланды.
Валево қаласында «Студенттер тізімінің» өкілдері өткен жылдың тамызында наразылық шерулерін тарату кезінде шамадан тыс күш қолданылғанына байланысты жергілікті полиция басшылығының 24 сағат ішінде отставкаға кетуін талап етті.
Ал «Студенттер тізімінің» өкілдері өз жақтастарын күш қолданудан бас тартуға шақырды.
«Сайлау процесі әлі жалғасып жатыр. Бұрынғы биліктің жеңілісін мойындауы құқықтық және институционалдық рәсімдерді алмастыра алмайды. Сондықтан біздің жеңісіміз бәрінің аяқталғанын білдірмейді, керісінше, елімізді қалпына келтіруге бағытталған ұзақ процестің басталғанын көрсетеді», – делінген «Студенттер тізімінің» әлеуметтік желілерде жарияланған үндеуінде.
Өткен жексенбіде Сербияда өткен парламент сайлауында жеңіске жеткен «Студенттер тізімі» парламенттегі көпшілік орынға ие болып, парламенттің жаңа басшылығын сайлауға және үкімет құруға мүмкіндік алды.
