Factcheck.kz хабарлайды: «Респонденттердің 45,4%-ы ақпаратты мемлекеттік тілде алуды жөн көреді, ал әлеуметтік желілер жаңалықтардың негізгі көзі болып қала береді. 2026 жылғы 24 ақпан мен 6 наурыз аралығында DEMOSCOPE қоғамдық пікірді жедел мониторингілеу бюросы азаматтар арасында «Ақпарат көздеріне деген сенім» тақырыбында сауалнама жүргізді. Сауалнама нәтижелері қазақстандықтардың медиатұтыну құрылымы біркелкі емес екенін және көп жағдайда тілдік таңдауы мен респонденттердің жас ерекшеліктеріне тәуелді екенін көрсетті. Негізгі үрдіс – медиакеңістікте қазақ тілінің рөлінің күшеюі. Зерттеу нәтижесіне сәйкес, азаматтардың басым бөлігі — 76,5% — ақпаратты қазақ тілінде алады. Оның ішінде 45,4%-ы ақпаратты негізінен мемлекеттік тілде тұтынуды жөн көреді, ал 31,1%-ы қазақ және орыс тілдерін қатар пайдаланады. Сонымен бірге респонденттердің 21,1%-ы ақпаратты орыс тілінде алады. Ақпарат көздеріне деген сенім деңгейі медиатәуелділіктің маңызды көрсеткіші болып табылады. Сауалнама нәтижелері аудиторияның көптеген медиаресурстарға сенімінің төмен екенін көрсетті. Респонденттердің жартысынан астамы тек екі дереккөзді салыстырмалы түрде сенімді деп санайды: мемлекеттік бұқаралық ақпарат құралдары (57,4%) және туыстар, достар мен таныстар (54,4%). Сонымен қатар аталған ақпарат көздеріне сенбейтіндердің үлесі тиісінше 30,9% және 29,7%-ды құрайды».
Еуразия24 пікірі:
Қазақстанның медиакеңістігі барған сайын әртараптанып, бәсекелік сипаты күшейіп, сапалық тұрғыдан жаңа деңгейге көтеріліп келеді. Сауалнама деректері халықты ақпараттандыруда мемлекеттік тілдің рөлі цифрлық платформалар арқылы нығайып отырғанын көрсетеді. Бұл қазақ тіліндегі толыққанды медианарықты қалыптастыруға бағытталған мемлекеттік саясаттың нәтижесін аңғартады. Сонымен қатар аудиторияның ақпарат көздеріне деген сенімі бұрынғыдай қалыпты қабылданбай, саналы таңдауға негізделе бастады. Бұл үрдіс ақпараттық ортаның тұрақтылығын күшейтуге ықпал етеді. Қазақстандықтардың үштен бірі екі тілдегі контентті қатар пайдаланады. Соның нәтижесінде медиакеңістік тарылмай, керісінше икемді болып, аудитория сұранысына бейімделе түсуде. Әлеуметтік желілердің жаңалық көзі ретіндегі басымдығы — жаһандық үрдіс, бұл тұрғыда Қазақстан да ерекшеленбейді. Жекелеген медиа түрлерінің үстемдігінің әлсіреуі және көпарналы форматқа көшу контент сапасының артуына әсер етуі тиіс. Сауалнамадағы тағы бір маңызды нәтиже — респонденттердің 57,4%-ы мемлекеттік бұқаралық ақпарат құралдарына сенім білдіреді. Бұл аудиторияның ақпаратты таңдауда талғамы күшейіп, сенсациялық мазмұннан гөрі тексерілген дерекке басымдық бере бастағанын көрсетеді.
