Астана. 22 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев су ресурстарын басқару саласын цифрландыруды жеделдету және Сырдария мен Әмудария өзендері алаптарында бірыңғай мониторинг жүйесін енгізу қажеттігін мәлімдеді.
«Қазақстан мен Өзбекстан Сырдария алабындағы он учаскені автоматтандыру жұмыстарына кірісті. Бұл тәжірибені бүкіл Арал теңізі алабы деңгейінде кеңейтуге болады», – деді Тоқаев Астанада өткен Аралды құтқару халықаралық қоры құрылтайшы мемлекеттер басшылары кеңесінің отырысында.
Президент су саласын цифрландыруды, соның ішінде Сырдария мен Әмудария алаптарында бірыңғай автоматтандырылған мониторинг жүйесін енгізуді өзекті міндет деп атады. Оның айтуынша, бұл деректердің ашықтығы мен нақтылығын қамтамасыз етеді.
Сондай-ақ Мемлекет басшысы Аралды құтқару халықаралық қорын институционалдық тұрғыдан одан әрі дамыту мәселесі әлі де өзекті екенін атап өтті.
«Бұл үдеріс біршама созылып кеткенін айту керек. Алғашқы қадам ретінде мемлекетаралық энергетикалық комиссияны құруды аяқтау ұсынылады. Тәжірибе көрсеткендей, энергетика саласындағы үйлесімді іс-қимыл біздің елдерімізді тұрақты әрі сенімді сумен қамтамасыз етуде маңызды рөл атқарады. Осыған байланысты су және энергетика комиссияларының жұмысын үйлестіру қажет деп санаймыз», – деді Тоқаев.
«Бастапқы кезеңде мемлекетаралық энергетикалық комиссияның қызметін Сырдария алабына қатысты іске қосуға болады. Кейін өзара іс-қимыл тетіктері жолға қойылған соң, бұл форматты Арал теңізі алабының барлығына кеңейту мүмкін болады. Мұндай кезең-кезеңімен жүзеге асырылатын тәсіл өңір елдерінің мүдделерін теңгерімді түрде ескеруге мүмкіндік береді», – деп түйіндеді ол.
