Астана. 30 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев пен Ресей Президенті Владимир Путин телефон арқылы сөйлесіп, Қазақстан мен Ресейдің XXII Өңіраралық ынтымақтастық форумына дайындық мәселелерін талқылады. Бұл туралы Ақорданың баспасөз қызметі хабарлады.
«Әңгіме барысында шілде айының соңында Омбы қаласында өтетін Қазақстан мен Ресейдің XXII Өңіраралық ынтымақтастық форумына дайындыққа ерекше назар аударылды», – делінген хабарламада.
Қасым-Жомарт Тоқаев Ресей президентінің биылғы мамыр айында Қазақстанға жасаған мемлекеттік сапары барысында қол жеткізілген келісімдер екіжақты ынтымақтастықтың барлық бағытына елеулі серпін бергенін атап өтті.
Ақорданың мәліметінше, екі елдің үкіметтері қол жеткізілген уағдаластықтарды кезең-кезеңімен жүзеге асырып келеді.
Бұған дейін Тоқаев форумның Омбыда 20 тамызда өтетінін хабарлаған болатын.
Өңіраралық ынтымақтастық форумы – Қазақстан мен Ресей арасындағы экономикалық саладағы ең ауқымды әрі маңызды екіжақты іс-шаралардың бірі. Форум аясында Қазақстан-Ресей және Ресей-Қазақстан іскерлік кеңестерінің бірлескен отырысы, сондай-ақ іскерлік байланыстар биржасы ұйымдастырылады.
