Дубай. 30 маусым. ИНТЕРФАКС – АҚШ пен Иран арасындағы түпкілікті келісім жөніндегі келіссөздердің қашан басталатыны Вашингтонның өзара түсіністік туралы меморандум талаптарын орындауына байланысты болады. Бұл туралы сейсенбі күні Иран Сыртқы істер министрлігі мәлімдеді.
«Бұл меморандумның 1, 5, 10 және 11-тармақтарының орындалуына байланысты», – деп Иран СІМ өкілі Исмаил Багаидің сөзін келтіреді Mehr агенттігі.
Аталған тармақтар, атап айтқанда, әскери іс-қимылдарды, соның ішінде Ливандағы операцияларды дереу және толық тоқтатуға, сондай-ақ Ормуз бұғазы арқылы кемелердің өту тәртібіне қатысты.
Багаидің айтуынша, Тегеран алдағы бірнеше күнде қазіргі жағдайды бағалап, түпкілікті келісім бойынша келіссөздерді қашан бастау жөнінде шешім қабылдайды.
АҚШ-пен өзара іс-қимылға тоқталған Иран СІМ өкілі екі елдің әскери құрылымдары арасында тікелей байланыс жоқ екенін, алайда саяси деңгейдегі байланыс сақталып отырғанын айтты.
Mehr агенттігінің мәліметінше, Багаи меморандумға қол қойылғаннан бері Иран мұнайы мен мұнай-химия өнімдерін сату үдерісі «айтарлықтай жеңілдегенін» де атап өтті.
17 маусымда АҚШ пен Иран қашықтан 14 тармақтан тұратын өзара түсіністік туралы меморандумға қол қойған болатын. Құжатта Иранның Ормуз бұғазын дереу ашуы және АҚШ-тың теңіз блокадасын алып тастауы қарастырылған.
22 маусымда АҚШ Ираннан шыққан мұнайды, мұнай-химия өнімдерін және мұнай өнімдерін өндіруге, сатуға, жеткізуге немесе жөнелтуге қатысты мәмілелерді, соның ішінде санкциялық тізімдегі кемелер қатысатын операцияларды 21 тамызға дейін санкциялардан уақытша босату туралы шешім қабылдады.
