Қазақстан халық партиясының хабарлауынша, Астанада партияның кезектен тыс XXV съезі өтті. Бұл – Қазақстан Республикасының жаңа Конституциясы күшіне енгеннен кейін өткен партияның алғашқы съезі.
Ауқымды саяси жиынның қорытындысында 2026 жылғы 23 тамызға белгіленген Құрылтай сайлауына арналған партияның сайлауалды бағдарламасы ресми түрде бекітілді. Сондай-ақ Құрылтай депутаттығына ұсынылатын 72 кандидаттан тұратын партиялық тізім мақұлданып, Саяси кеңестің жаңа құрамы сайланды.
Еуразия24 пікірі:
Бір қызығы, Қазақстан халық партиясы кандидаттар тізімін өзінің ресми сайтында жарияламаған. Алайда бұл тізім ProKadry.kz сайтында жарияланған.
Сонымен, назар аударарлық жайттарға тоқталсақ. Құрылтай сайлауына Қазақстан халық партиясы VIII сайланған Мәжілістің бес депутатының төртеуін – Асылбек Нұралинді, Кенжегүл Сейтжанды, Ирина Смирнованы және Ислам Сұңқарды ұсынған. Ал партияның белсенді мүшелерінің бірі Мағеррам Мағеррамов кандидаттар тізіміне енбеген.
Бұдан бөлек, партия төрағасы Нұрсұлтан Шоқановты қоса алғанда, Қазақстан халық партиясының бірнеше басшылық құрам өкілі де кандидат ретінде бекітілді.
Партиялық тізімге сондай-ақ белгілі қоғам қайраткерлері мен түрлі сала өкілдері енгізілген. Олардың қатарында Қазақстанның бұрынғы Денсаулық сақтау вице-министрі Ләззат Ақтаева, Еңбек министрлігі Заң қызметі департаментінің директоры Серік Берқамалов, адвокат Асқар Қаймақов, «Атамекен» Ұлттық кәсіпкерлер палатасы басқармасы төрағасының орынбасары Мұратбек Маханов, актриса әрі режиссер Венера Нығматулина және Әйелдер істері жөніндегі ұлттық комиссия төрағасының орынбасары Ләззат Сүлеймен бар.
