Астана. 8 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Қанатбек Жайсанбаевты Қазақстан Халық кеңесі төрағасының орынбасары етіп тағайындады. Бұл туралы Ақорданың баспасөз қызметі хабарлады.
«Мемлекет басшысының Жарлығымен Жайсанбаев Қанатбек Бақытұлы Қазақстан Халық кеңесі төрағасының орынбасары – Қазақстан Халық кеңесі хатшылығының басшысы болып тағайындалды. Осыған дейін атқарған қызметінен босатылды», – делінген хабарламада.
Қанатбек Жайсанбаев 2022 жылғы желтоқсаннан бері Қазақстан Республикасы Президентінің көмекшісі – Президент Әкімшілігінің өтініштерді қарауды бақылау бөлімінің меңгерушісі қызметін атқарған.
Еске салсақ, жаңа Конституция күшіне енгеннен кейін Қазақстанда қазіргі Қазақстан халқы Ассамблеясының орнына жаңа жоғары консультативтік орган – Қазақстан Халық кеңесі құрылды. Оның құрамына елдегі барлық этностардың өкілдері енеді. Кеңес 126 мүшеден тұрады: 42 өкіл – этномәдени бірлестіктерден, 42 өкіл – ірі қоғамдық бірлестіктерден, ал тағы 42 өкіл – мәслихаттар мен өңірлік қоғамдық кеңестерден ұсынылады.
Халық кеңесінің барлық мүшесін Президент тағайындайды, ал кеңес төрағасын оның мүшелері өзара сайлайды.
2026 жылғы 15 наурызда республикалық референдумда қабылданған Қазақстанның жаңа Конституциясы 2026 жылғы 1 шілдеде күшіне енді.
