Астана. 17 шілде. INTERFAX-ҚАЗАҚСТАН – Президент Қасым-Жомарт Тоқаев жасанды интеллектіні (ЖИ) реттеу, стандарттар мен этика мәселелері бойынша тұрақты халықаралық сарапшылық алаң құруға шақырды.
«Барлық қатысушы мемлекеттер мен мүдделі тараптарды жасанды интеллектті реттеу, стандарттар және этика мәселелері жөніндегі тұрақты сарапшылық платформаны құруға шақырамын», – деді Тоқаев Шанхайда өткен Жасанды интеллект жөніндегі дүниежүзілік конференцияда сөйлеген сөзінде.
Президенттің сөзін Ақорданың баспасөз қызметі келтірді.
Мемлекет басшысының пікірінше, жасанды интеллекттің мүмкіндіктері адамзаттың оны түсіну, бағалау және тиімді реттеу қабілетінен озық дамып келеді.
«Түптеп келгенде, жасанды интеллекттің болашағын адамдар айқындайды. Сондықтан бұл саладағы таланттар үшін бәсеке күшейе түседі. Біз жас ұрпақты цифрлық дағдылармен қатар сыни ойлау қабілетіне, ізденімпаздыққа және жоғары этикалық жауапкершілікке баулуымыз қажет», – деді Президент.
Осыған байланысты Қасым-Жомарт Тоқаев Жасанды интеллект саласындағы ынтымақтастық жөніндегі дүниежүзілік ұйымның аясында халықаралық мектептер, озық тәжірибе орталықтары мен академиялық әріптестік желісін құруды ұсынды.
