Бейжің. 21 шілде. ИНТЕРФАКС – Қытай Сыртқы істер министрлігі Жапонияның ел маңындағы теңіз акваториясында Қытай әскери кемелерінің әрекетіне қатысты алаңдауына негіз жоқ деп мәлімдеді. Бұл туралы Global Times хабарлады.
Басылымның мәліметінше, Қытай СІМ ресми өкілі Линь Цзянь жапондық БАҚ-та Токионың Қытай әскери кемелерінің Жапонияның айрықша экономикалық аймағында оқ ату жаттығуларын өткізуіне байланысты түсініктеме сұрағаны жөніндегі ақпаратқа пікір білдірген.
«Жапонияның алаңдаушылығы мүлде негізсіз. Қытай мұндай ұстанымды үзілді-кесілді қабылдамайды», – деді Линь Цзянь.
Ол сондай-ақ Қытай тарапы бұған дейін Қытай мен Ресейдің бірлескен теңіз патрулі мен әскери жаттығуларына қатысты Бейжіңнің ұстанымын жариялағанын атап өтті.
Бұған дейін Kyodo агенттігі Жапония Қорғаныс министрлігіне сілтеме жасап, 19 шілдеде Қытайдың зымыранмен қаруланған эсминеці Тынық мұхитындағы Окинотори аралынан оңтүстік-батысқа қарай шамамен 180 шақырым жерде пулеметтен оқу-жаттығу атысын өткізгенін хабарлаған болатын.
Ақпаратқа сәйкес, бұл эсминец бұған дейін Окинотори аралынан оңтүстік-батысқа қарай шамамен 330 шақырым жерде жүрген Қытай мен Ресейдің бірлескен кеме тобының құрамында болған.
Өткен жұмада Қытай Ұлттық қорғаныс министрлігінің ресми өкілі Цзян Бинь Қытай мен Ресей арасындағы әскери ынтымақтастықтың, оның ішінде Азия-Тынық мұхиты өңіріндегі (АТМӨ) бірлескен теңіз патрулінің үшінші елдерге қарсы бағытталмағанын мәлімдеген.
«Қытай мен Ресей қарулы күштерінің ынтымақтастығы (…) үшінші елдерге қарсы бағытталмаған», – деген Цзян Биньнің сөзін қытайлық бұқаралық ақпарат құралдары келтіреді. Ол бұл пікірін кейбір сарапшылардың Қытай мен Ресейдің АТР-дегі бірлескен патрулі АҚШ пен оның одақтастарының іс-қимылына жауап ретінде ұйымдастырылды деген тұжырымына қатысты айтты.
Өткен сейсенбіде Ресейдің Тынық мұхиты флоты «Теңіз өзара іс-қимылы – 2026» бірлескен ресей-қытай әскери оқу-жаттығуы аяқталғаннан кейін екі елдің әскери кемелері Сары теңізге бірлескен патруль жүргізу үшін шыққанын хабарлаған.
