Астана. 21 шілде. ИНТЕРФАКС-ҚАЗАҚСТАН – Қазақстанның Орталық сайлау комиссиясы (ОСК) сейсенбі күні Құрылтай депутаттарының сайлауына қатысатын «Ауыл» халықтық-демократиялық патриоттық партиясының кандидаттар тізімін тіркеді.
ОСК отырысында комиссия мүшелері партия ұсынған кандидаттардың Конституция мен «Қазақстан Республикасындағы сайлау туралы» Конституциялық заң талаптарына сәйкестігін анықтау және партиялық тізімді тіркеу туралы хаттамаларды қабылдады.
«Ауыл» партиясының тізіміне 69 кандидат енгізілген.
ОСК хатшысы Шавхат Өтемісовтің айтуынша, Комиссияның сұрауы негізінде уәкілетті мемлекеттік органдар партиялық тізімге енгізілген кандидаттардың заң талаптарына сәйкестігін тексерген.
«Партиялық тізімдегі кандидаттардың 29-ы әйелдер, жастар және мүгедектігі бар адамдар санатына жатады. Бұл жалпы тізімнің 42 пайызын құрайды. Заңда белгіленген квота толық сақталған. Тізімге енгізілген барлық кандидат Конституция мен сайлау туралы Конституциялық заң талаптарына сәйкес келеді», – деді Өтемісов.
Осылайша, Орталық сайлау комиссиясы Құрылтай сайлауына кандидаттарын ұсынған Қазақстандағы барлық жеті саяси партияның партиялық тізімдерін толық тіркеді.
Бұған дейін ОСК «Әділет» партиясының, «Байтақ» жасылдар партиясының, Қазақстан халық партиясының, «Ақ жол» демократиялық партиясының, Жалпыұлттық социал-демократиялық партияның (ЖСДП) және Respublica партиясының кандидаттар тізімдерін тіркеген болатын.
Құрылтай сайлауы 23 тамызға белгіленген.
Құрылтай – заң шығару билігін жүзеге асыратын Қазақстанның жоғары өкілді органы. Ол алғаш рет сайланғалы отыр. Бұған дейін елде Мәжіліс пен Сенаттан тұратын қос палаталы Парламент жұмыс істеген.
Құрылтай 145 депутаттан құралады. Олар бірыңғай жалпыұлттық сайлау округі бойынша пропорционалды сайлау жүйесі арқылы сайланады. Яғни сайлаушылар партиялық тізімдерге дауыс береді. Депутаттар жалпыға бірдей, тең және төте сайлау құқығы негізінде жасырын дауыс беру арқылы бес жыл мерзімге сайланады. Құрылтайдан орын алу үшін саяси партиялар бірыңғай жалпыұлттық сайлау округі бойынша берілген дауыстың кемінде 5 пайызын жинауы тиіс.
Қазіргі уақытта Қазақстанда жеті саяси партия ресми тіркелген. Олар: «Әділет» партиясы, оған биыл маусым айының ортасында қайта ұйымдастыру арқылы биліктегі Amanat партиясы қосылды, сондай-ақ «Ақ жол» демократиялық партиясы, Қазақстан халық партиясы, «Ауыл» халықтық-демократиялық патриоттық партиясы, Жалпыұлттық социал-демократиялық партия, «Байтақ» жасылдар партиясы және Respublica партиясы. Бұрынғы қос палаталы Парламент құрамында алты саяси партияның өкілдері болған.
