Астана. 20 тамыз. ИНТЕРФАКС-ҚАЗАҚСТАН – Қазақстанда «Ауылдық денсаулық сақтауды жаңғырту» ұлттық жобасы аясында алғашқы медициналық-санитарлық көмектің (МӘСК) 655 нысаны салынды. Соның нәтижесінде ауылдық жерлерде тұратын 1 млн-ға жуық адамға медициналық қызмет алу мүмкіндігі жасалды, деп хабарлады Үкіметтің баспасөз қызметі.
Үкіметтің бейсенбі күні таратқан хабарламасында: “Ауылдық елді мекендерді алғашқы медициналық-санитарлық көмек ұйымдарымен қамтамасыз ету бағыты бойынша 655 нысанның құрылысы толық аяқталды. Оның ішінде 260 медициналық пункт, 235 фельдшерлік-акушерлік пункт және 160 дәрігерлік амбулатория бар”, – делінген.
Жалпы нысандардың 427-сі тозығы жеткен және апатты жағдайдағы ғимараттардың орнына салынды. Бұған дейін арнайы ғимарат болмағандықтан медициналық көмек үй жағдайында көрсетіліп келген елді мекендерде тағы 208 нысан бой көтерді. Ал медицина қызметкерлері де, тиісті инфрақұрылымы да болмаған ауылдарда 20 нысан салынды.
«Осы 655 нысанның пайдалануға берілуі нәтижесінде 1 млн-ға жуық ауыл тұрғыны медициналық қызметпен қосымша қамтылды», – делінген хабарламада.
Сонымен қатар 32 аудандық аурухана күрделі жөндеу, қайта жаңарту және заманауи медициналық жабдықтармен жарақтандыру арқылы көпбейінді орталық аудандық ауруханаларға айналдырылып жатыр. Медициналық мекемелерге компьютерлік және магниттік-резонанстық томографтар, ангиографтар, реанимациялық және хирургиялық жабдықтар орнатылуда. Үкіметтің бағалауынша, бұл 4 млн-нан астам ауыл тұрғынына мамандандырылған және жоғары технологиялық медициналық көмек көрсетуге мүмкіндік береді.
Жаңа және жаңғыртылған медициналық нысандарда жұмыс істеу үшін 1,1 мың медицина маманы даярланды.
Президент Қасым-Жомарт Тоқаевтың тапсырмасымен жүзеге асырылған «Ауылдық денсаулық сақтауды жаңғырту» ұлттық жобасы ауылдық жерлердегі медициналық инфрақұрылымды кешенді дамытуға, жаңартуға және саладағы кадрлық әлеуетті нығайтуға бағытталған.
