МӘСКЕУ. 11 қыркүйек. ИНТЕРФАКС – Үндістанда 2026 жылғы қазаннан 2027 жылғы қыркүйекке дейінгі маусымда 29–31 млн тонна қант өндірілуі мүмкін. Bloomberg сауалнамасына қатысқан сарапшылар, трейдерлер мен сала өкілдері осындай болжам жасап отыр.
Ал биылғы маусымда Үндістанның қант және биоэнергетика өндірушілері қауымдастығы (ISMA) өндіріс көлемі 31 млн тонна болады деп есептейді.
Мамыр айында Халықаралық қант ұйымы (ISO) Эль-Ниньо құбылысының күшеюі Азия елдеріндегі егінге кері әсер етіп, әлемдік нарықта шамамен 260 мың тонна қант тапшылығына әкелуі мүмкін екенін ескерткен.
Үндістанның ауыл шаруашылығы муссондық жауын-шашынға тәуелді. Ал биыл оның мөлшері әзірге қалыпты деңгейден 15%-ға төмен.
Келесі маусымда өнім азаяды деген болжам қант бағасының өсуіне әсер етті. Нью-Йорк биржасында қант фьючерстері жыл басынан бері шамамен 30%-ға қымбаттаған.
Ішкі нарықтағы қант бағасының рекордтық деңгейге жетуіне байланысты Үндістан билігі тамызда тазартылмаған қантты бажсыз әкелуге рұқсат берді. Сонымен қатар дилерлер мен көтерме сатып алушылардың қолында сақталатын қант көлеміне шектеу қойылды.
«Келесі жылы елдегі қант қорын қажетті деңгейде сақтау үшін импортқа жүгінуге тура келуі мүмкін. Ішкі нарықтағы қазіргі баға зауыттарға этанолдан гөрі қант өндірген тиімді болатынын көрсетіп отыр», – деді Gradient Commercial Pvt. компаниясының директорлар кеңесінің мүшесі Ятин Вадхвана Нью-Делиде өткен салалық конференцияда.
Bloomberg сауалнамасына қатысқан 11 сарапшының алтауы қант этанол өндірісіне жіберілмейді деп есептейді. Тағы бесеуі қажетті қорды толықтыру үшін Үндістан екінші жыл қатарынан қант импорттауы мүмкін екенін айтты.
Covrig Analytics компаниясының жетекші сарапшысы Клаудиу Ковригтің болжамынша, қазіргі импорттық квота таусылғаннан кейін Үндістан қорын толықтыру үшін келесі жылдың шілдесінен бастап шетелден қант сатып алуы мүмкін. Оның пікірінше, өндіріс 2027–2028 жылғы маусымда да төмендейді. Импорт көлемі 2–3 млн тоннаға жетуі ықтимал.
Үндістанның Азық-түлік министрлігінің өкілі Ашвини Шривастава бейсенбіде билік қант өндірушілерді бағаны негізсіз көтермеуге және биылғы мерекелік маусымда ішкі нарықты жеткілікті көлемде өніммен қамтамасыз етуге шақырғанын айтты. Үкімет бағаға жіті бақылау жүргізіп, өндіріс көлемін ай сайын қадағалап отырмақ.
Үндістан – әлемдегі ең ірі қант тұтынушы және қант өндіруден екінші орында тұрған ел.
