Бәсекелестікті қорғау және дамыту агенттігі хабарлайды:Қазақстан Республикасы Бәсекелестікті қорғау және дамыту агенттігі өңірлік әлеуметтік-кәсіпкерлік корпорациялар (ӘКК) арқылы бағаны тұрақтандыру тетігінің іске асырылуына жан-жақты талдау жүргізді. Аталған талдау нәтижелері әлеуметтік маңызы бар азық-түлік тауарларына бағаның өсуін тежеуге бағытталған бұл тетіктің тиімсіз қолданылып отырғанын және адал бәсекелестік қағидаттары, тең қолжетімділік пен ашықтық талаптарының жүйелі түрде бұзылатынын көрсетті. Бірқатар өңірлерде қарыз қаражаты бойынша келісім шарттарының орындалмауы, сондай-ақ қайтарымсыз ұзарту жағдайлары анықталды. Мәселен, бір кәсіпкерлік субъектісіне 489 миллион теңге көлемінде қаржы беріліп, ол бірнеше мәрте қайтарылмай ұзартылған. Осыған ұқсас жағдайлар 1,3 миллиард теңгеден астам сомада бөлінген қаражаттар бойынша да тіркелген. Сонымен қатар, жекелеген субъектілерге пайызсыз жеңілдетілген қарыздар беру фактілері анықталды, бұл өз кезегінде негізсіз артықшылықтар туғызған. Бұдан бөлек, бюджет қаражаты есебінен сатып алынған өнім әрдайым сауда желілеріне жеткізілмеген. Екі жыл ішінде сатып алынған көлемнің небәрі 19 пайызы ғана іске асырылған, ал 2021 жылы алынған өнімнің бір бөлігі әлі күнге дейін өткізілмеген. Қаражатты тиімсіз пайдалану фактілері де анықталды. Мәселен, баға деңгейі жоғары болған кезеңде (қазан–сәуір айлары) картоп сатып алуға 5,1 миллиард теңге бөлінген, ал тапшылық байқалған уақытта (мамыр–шілде айлары), тұрақтандыру шаралары ерекше өзекті болғанына қарамастан қолданылмаған. Сонымен қатар, шарттардың орындалу мерзімі мен талаптарындағы айырмашылық тең қолжетімділік қағидаттарын бұзатыны анықталды.
Евразия24 пікірі:
Антимонополия қызметінің бұл жолғы әрекеті – орынды қадам. Расында да, әлеуметтік-кәсіпкерлік корпорациялардың (ӘКК) жұмысын сынға алмаған адам аз шығар.
Мәселен, 2022 жылы Мәжіліс депутаты Дания Еспаева олардың жұмысын мүлде тоқтату жөнінде бастама көтерген еді (https://kazpravda.kz/n/mahinatsii-s-zemley-pod-zastroyku-deputat-trebuet-likvidirovat-spk/ ). Депутаттың айтуынша, ӘКК-лердің негізгі мақсаты бастапқыда өңірлердің экономикалық дамуына серпін беру болғанымен, уақыт өте келе бұл ұйымдар әкімдіктердің қарамағындағы шаруашылық құрылымдарға айналып, тұрақтандыру қорларының қаржысын өз бетінше игере бастаған. Бұл пікір – ӘКК-ге айтылған жалғыз сын емес. Әрине, корпорация таратылған жоқ. Сондықтан Бәсекелестікті қорғау және дамыту агенттігінің (АЗРК) жүргізген мониторинг қорытындысы таңданыс тудырмайды. Миллиардтаған теңге көлеміндегі заңбұзушылықтар әшкереленсе де, бұл іске жауапты тұлғалардың ешқайсысы жауапкершілікке тартылмаған. Агенттік тек бір ғана ӘКК-ге 300 айлық есептік көрсеткіш (шамамен 1,18 миллион теңге) көлемінде айыппұл салып, тағы сегізіне ескерту жасаумен шектелген. Әрі қарай не болмақ? Тексеру аяқталып, бәрі ұмыт қала ма? Әлде келесі есеп бергенше күтеміз бе?..
