Стамбул. 9 қараша. ИНТЕРФАКС – Түркия президенті Режеп Тайып Ердоғанның мәлімдеуінше, Анкара мен Вашингтон Түркияның F-35 жойғыш ұшақтарын өндіру бағдарламасынан шығарылуына қатысты мәселелерді шешу бағытында жұмыс жүргізіп, бұл бағытта белгілі бір нәтижелерге қол жеткізді.
«АҚШ президенті Дональд Трамппен өткен соңғы келіссөздер барысында маңызды оң қадамдар жасалды. Бұл уәделер орындалады деп үміттенемін», – деп келтіреді Ердоғанның Әзірбайжаннан оралған кезде айтқан сөзін Anadolu агенттігі.
Сондай-ақ, Ердоған Пәкістан мен Ауғанстан арасындағы шиеленістің күшеюіне тоқталды. Бұған дейін тараптар үш раунд келіссөз өткізген, алайда осы аптада Стамбулда өткен келіссөздерде нәтиже болмаған.
Осыған орай, Ердоған келесі аптада Түркияның сыртқы істер министрі Хакан Фидан, қорғаныс министрі Яшар Гүлер және Ұлттық барлау ұйымының басшысы Ибрагим Калын Пәкістанға барып, осы мәселені талқылайтынын айтты.
Президент сондай-ақ Түркия Газа секторына гуманитарлық көмекті жеткізу және Судандағы қақтығысты реттеу бағытындағы күш-жігерін жалғастыратынын мәлімдеді.
Түркия 2019 жылы Ресейден төрт дивизион С-400 әуе шабуылына қарсы қорғаныс жүйесін сатып алған болатын. АҚШ Анкараның бұл шешіміне алаңдаушылық білдіріп, С-400 жүйелері арқылы Ресей F-35 ұшақтары туралы құпия ақпаратқа қол жеткізуі мүмкін екенін мәлімдеген. Нәтижесінде Вашингтон Түркияны F-35А бағдарламасынан шығарған.
Қараша айының басында Bloomberg агенттігі дереккөздерге сілтеме жасап, Түркия С-400 кешендерін қарудан шығармайтынын, алайда оларды бақылау үшін АҚШ-пен бірлескен техникалық механизм құруға дайын екенін хабарлаған. Сонымен қатар, Анкара 40 бірлік F-35 сатып алуға қызығушылық танытқан, алайда бұл үшін АҚШ Конгресінің С-400 сатып алғаны үшін Түркияға енгізген санкцияларын алып тастау қажет.
