Астана. 14 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев отандық ауыл шаруашылығы өнімдерін шетелдік нарықтарға үздіксіз жеткізу үшін авиатасымал әлеуетін неғұрлым белсенді қолдану қажеттігін айтты.
«Сарапшылардың болжамынша, алдағы он жылда әлемде қызыл ет тұтыну көлемі 233 млн тоннаға дейін артады. Қазақстан бұл өнімді, әсіресе Азия елдеріне, ірі көлемде жеткізе алатын әлеуетке ие. Қазіргі уақытта қой етін экспорттау бойынша еліміз Моңғолия, Нидерланд, Испания, Франция сияқты елдерден қалып қойып отыр. Алайда бізде жайылымдық жер қоры анағұрлым мол. Сондықтан қой шаруашылығының экспорттық әлеуетін толық ашуға қолайлы жағдай жасау қажет», – деді Президент Ауыл шаруашылығы қызметкерлерінің форумында.
Мемлекет басшысының айтуынша, Парсы шығанағы елдері Қазақстаннан ет өнімдерін жыл бойы тұрақты түрде алуға қызығушылық танытып отыр. Алайда, қазіргі таңда ауыл шаруашылығы өнімдерін әуе арқылы тасымалдау тетіктері үйлестірілмеген әрі тиісті деңгейде реттелмеген.
«Кәсіпкерлер бұл мәселеде көбіне жалғыз қалады. Бүгін маған еттің Біріккен Араб Әмірліктеріне тұрақты әуе рейстерімен жөнелтіліп жатқаны туралы мәлімет берілді. Бұл тәсілдің тиімділігіне күмән бар», – деді Қасым-Жомарт Тоқаев.
Сонымен қатар, Президенттің пікірінше, Астана, Алматы, Шымкент, Ақтөбе, Қарағанды және Ақтау әуежайлары арнайы экономикалық аймақтар аясындағы жеңілдіктерді ескерсек, халықаралық әуе бағыттарына кіріккен өңірлік логистикалық хабтарға айналуға әбден қауқарлы.
«Аталған әуежайлардың осы режимде толыққанды жұмыс істеуі ауыл шаруашылығы өнімдерін сыртқы нарықтарға тұрақты жеткізуге мүмкіндік береді. Үкімет бұл мәселені жан-жақты қарап, нақты ұсыныстар әзірлеуі тиіс», – деп түйіндеді Мемлекет басшысы.
