Астана. 11 желтоқсан. ИНТЕРФАКС-ҚАЗАҚСТАН – Қазақстан Иранмен ынтымақтастықты кеңейтуге мүдделі және бұл елді сенімді серіктес әрі жақын көрші деп санайды, деп мәлімдеді Қазақстан Президенті Қасым-Жомарт Тоқаев.
«Біздің елдерді Каспий теңізі байланыстырады. Қазақстан үшін Иран – Таяу Шығыстағы жақын көрші және сенімді серіктес. Біз иран халқына әрдайым зор құрметпен қараймыз. Қандай қиындықтар болса да, екіжақты байланыстарымыз нығайып келеді», – деді Тоқаев бейсенбі күні Астанада Иран Президенті Масуд Пезешкиянмен келіссөздер барысында.
Мемлекет басшысы Қазақстанның Иранды әрдайым қолдайтынын және екі елдің өзара іс-қимыл әлеуеті жоғары екенін атап өтті.
«Астана мен Тегеран арасында, соның ішінде үкіметтік деңгейде де, сындарлы саяси диалог қалыптасқан. Екіжақты келісімдер жүзеге асырылып жатыр, парламентаралық ынтымақтастық кеңеюде. Сауда-экономикалық өзара іс-қимыл да өсім көрсетуде. Биылғы 10 айдың қорытындысы бойынша сауда көлемі 2024 жылмен салыстырғанда 40%-ға артты. Бұл – жақсы нәтиже. Біз осы қарқынды сақтап, өзара сауда көлемін одан әрі арттыруымыз қажет», – деді Тоқаев.
Өз кезегінде Масуд Пезешкиян Қазақстанмен ынтымақтастықтың тұрақты түрде дамып келе жатқанын атап өтіп, оны саяси, экономикалық, мәдени-гуманитарлық және қауіпсіздік салаларында күшейту қажеттігін айтты.
