Астана. 18 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Жапонияға жасаған алғашқы ресми сапарын император Нарухитомен кездесуден бастады. Бұл туралы бейсенбі күні Мемлекет басшысының баспасөз қызметі хабарлады.
Кездесу Токиодағы императорлық сарайда өтті.
«Президент Күншығыс елі көптеген жылдар бойы тәртібі мен төзімділігі арқылы қазақстандықтарды жігерлендіріп келе жатқанын атап өтті. Оның айтуынша, Қазақстан мен Жапонияны өзара құрметке және түрлі салалардағы нәтижелі ынтымақтастыққа негізделген терең тамырлы достық қатынастар байланыстырады», – делінген баспасөз қызметінің хабарламасында.
Өз кезегінде император Нарухито Президент Тоқаевтың бұл сапары Жапония мен Қазақстан арасындағы қарым-қатынастар тарихындағы маңызды кезеңге айналып, екі елдің байланысын сапалық жаңа деңгейге көтеретініне сенім білдірді.
«Мемлекет басшысы Қасым-Жомарт Тоқаев пен император Нарухито екіжақты ынтымақтастық мәселелері, сондай-ақ халықаралық күн тәртібіндегі өзекті тақырыптар бойынша пікір алмасты», – деп мәлімдеді Президент баспасөз қызметі.
