Душанбе. 25 желтоқсан. ИНТЕРФАКС – Тәжікстан Республикасы Ұлттық қауіпсіздік мемлекеттік комитетінің Шекара әскерлері баспасөз орталығы Ауғанстанмен мемлекеттік шекарада тәжік шекарашылары мен террористік топ арасында қақтығыс болғанын хабарлады.
Ресми мәліметке сәйкес, 23 желтоқсан күні сағат 23:30-да террористік ұйымға мүше үш қарулы адам Ауғанстан аумағынан заңсыз түрде мемлекеттік шекараны кесіп өтіп, Шамсиддин-Шохин ауданы аумағындағы 0341 «Сарчашма» шекара отрядының №5 шекара бекетіне жақын Кавок елді мекеніне кірген.
Шекара әскерлері жүргізген жедел-іздестіру іс-шараларының нәтижесінде күдіктілердің орналасқан жері 24 желтоқсан күні сағат 11:15-те анықталған. Оларды ұстау кезінде террористер берілуден бас тартып, қарулы қарсылық көрсетіп, оқ жаудырған. Алдын ала деректер бойынша, олар Тәжікстанның шекаралық нысандарының біріне шабуыл жасауды жоспарлаған.
Арнайы операция барысында үш террористтің барлығы залалсыздандырылды. Оқиға орнынан үш M16 автоматы, бір Калашников автоматы, дыбыс бәсеңдеткіштері бар шетелдік өндірістегі үш тапанша, он қол гранатасы, түнгі көру құрылғысы, жарылғыш заттар және өзге де оқ-дәрілер тәркіленді.
Қақтығыс салдарынан Тәжікстан ҰҚМК Шекара әскерлерінің екі әскери қызметшісі қаза тапты.
Баспасөз орталығының мәліметінше, соңғы бір ай ішінде бұл Ауғанстан тарапынан мемлекеттік шекараны заңсыз кесіп өту арқылы жасалған үшінші оқиға болып отыр. Бұған дейінгі жағдайларда да террористік әрекеттер мен қарулы шабуылдар салдарынан бейбіт тұрғындар мен әскери қызметшілер арасында адам шығыны болған.
«Бұл оқиғалар ‘Талибан’ қозғалысының үкіметі тарапынан тәжік-ауған шекарасындағы қауіпсіздікті қамтамасыз ету және террористік топтармен күрес жөніндегі халықаралық міндеттемелер мен берілген уәделердің жүйелі түрде орындалмай отырғанын көрсетеді», – делінген Тәжікстан ҰҚМК мәлімдемесінде.
