ТАСС агенттігінің хабарлауынша, Армения Шанхай ынтымақтастық ұйымына (ШЫҰ) мүше болу мақсатында ресми түрде өтініш берді. Бұл жөнінде Арменияның премьер-министрі Никол Пашинян Ереванда өткен баспасөз мәслихатында мәлім етті.
«Иә, Армения ШЫҰ-на мүшелікке өту туралы өтініш білдірді. Бұл – біздің теңгерімді және үйлесімді сыртқы саясат жүргізу күн тәртібімізбен толық сәйкес келеді. Біз бұл бағытта жұмысты жалғастырамыз», – деді үкімет басшысы.
Оның айтуынша, Армения бұған дейін ШЫҰ-мен серіктестік орнатқан және қабылданған шешім ешбір тосын жағдайда туындаған жоқ. Бұл – ұйым аясында жүріп жатқан құрылымдық өзгерістермен тығыз байланысты.
Пашинянның айтуынша, Армения солтүстікте де, оңтүстікте де, батыс пен шығыста да серіктестік қатынастар орнатуды көздейтін теңгерімді сыртқы саясат жүргізуді жалғастыра бермек.
Евразия24 пікірі:
Арменияның премьер-министрі Никол Пашинян жуырда өткен баспасөз мәслихатында елдің Ұжымдық қауіпсіздік туралы шарт ұйымынан (ҰҚШҰ) шығуы мүмкін екенін және Шанхай ынтымақтастық ұйымына (ШЫҰ) толыққанды мүшелік негізінде кіруге ұмтылып отырғанын мәлімдеді.
Бұл мәлімдеме сарапшылар арасында әртүрлі пікір туғызды. Стратегиялық зерттеулер және бастамалар аналитикалық орталығының (АЦСИИ) басшысы Айк Халатянның пікірінше, Арменияның ШЫҰ-ға қосылу туралы шешімі Батысқа бет бұру және армян-ресей қатынастарының нашарлауы аясында қабылданған.
Ал саясаттанушы, иранист және шығыстанушы Карине Геворгян бұл қадамға Қытайдың ықпалын жоққа шығармайды. Оның айтуынша, Армения аумағы шағын ел болғанымен, Қытай үшін стратегиялық маңызы бар ірі құрлықаралық коммуникациялар жолында орналасқан. Бұл бағытта АҚШ, Түркия және Израиль белсенділік танытып отырғанын ескерсек, Арменияның геосаяси маңызы арта түседі.
Сарапшы атап өткендей, мәселе – өңірдегі ірі көлік дәлізі жобасына қатысты, және дәл осы тұрғыдан алғанда Армения Қытай үшін тұрақтылық факторы ретіндегі серіктеске айналуы ықтимал.
Айта кетейік, ШЫҰ бүгінгі таңда трансформация және кеңею кезеңінен өтуде. Бұл Арменияның бастамасын ұйымның қазіргі күн тәртібімен үйлесімді етеді. Бұған дейін Ресей Сыртқы істер министрі Сергей Лавров ШЫҰ сыртқы істер министрлері кеңесінің отырысы қорытындысы бойынша, ұйымның қыркүйекте өтетін саммитіне 30-ға жуық ел мен халықаралық ұйым өкілдері қатысатынын мәлімдеген.
