Prokadrykz Курсивке сілтеме жасап хабарлауы бойынша Қазақстанның банктері, бизнес өкілдері мен қарапайым азаматтары Перизат Қайрат атындағы қорға 1,3 млрд теңгеден астам қаражат аударғаны анықталды. Астанадағы сот отырысында «Biz Birgemiz Qazaqstan 2030» қоғамдық қорыарқылы жиналған қайырымдылықтың көлемі белгілі болды. Kaspi Bank – 620 млн теңге, Jusan Bank – 300 млн теңге, Асар-Уме (Палестинаға көмек) – 200 млн теңге, «Стройконструкция» АҚ – 200 млн теңге, MM Group Development– 10 млн теңге (GGG қолғаптары арқылы аукцион), НИШ ата-аналарынан – 901 855 теңге, Алматы Тазалық – 3 млн теңге көлемінде қаражат аударған. Алайда кейбір компаниялар аударылған қаражаттың нақты қалай жұмсалғаны жөнінде есеп ала алмағанын мойындады. Атап айтқанда, Jusan мен Асар-Уме тарапынан шығындардың ашықтығына қатысты күмән туындаған.
Евразия24 пікірі:
Перизат Қайратқа қатысты басталған сот ісі – Қазақстандағы қайырымдылық саласының көлеңкелі тұстарын айқындаған тағы бір резонансты оқиға. Миллиардтаған теңге көлемінде жиналған халық қаражатын иемденді деген айып тағылған Қайрат пен оның анасы Ғайни Алашбаева бұл іске тікелей тартылған тұлғалар ретінде сот алдында жауап беріп жатыр. Айыпталушылардың қоғамда қалыптасқан бейнесі – қарапайым, сенімге ие болған әйелдер, алайда тергеу оларды күрделі алаяқтық схеманың ортасында деп отыр. Қоғамның бір бөлігі оларды жұртты алдап, жеке байлыққа кенелді десе, екінші бөлігі сот процесінің әділ өтетініне үміт артады.
Бұл ретте, елде халықтан қайырымдылыққа қаржы жинайтын ондаған қор жұмыс істеп жатыр, бірақ құқық қорғау органдары тарапынан оларға қатысты нақты қадағалау шаралары байқалмайды. Ашық алаңда тек Перизат Қайраттың ісі көтерілді. Осыған байланысты кей сарапшылар бұл істі бұрынғы «Biz Birgemiz Qazaqstan 2030» қорының құрылтайшыларына, соның ішінде Қаңтар оқиғаларынан кейін шетелге кеткен Алматының экс-әкімі Бауыржан Байбекке жетелейтін «көпір» деп бағалайды.
