Қазақстанда аса қауіпті өндіріс санатына жатпайтын кәдімгі кәсіпорындағы жұмыс та кейде адам өміріне қауіп төндіруі мүмкін.
Павлодар облыстық Мемлекеттік еңбек инспекциясы департаментінің мәліметінше, Жоламан ауылындағы сүт фермасының аумағында оқыс оқиға орын алып, алты адам ажал құшқан. Бұл туралы Tengrinews.kz жазды. Қазіргі таңда оқиғаның қалай болғаны және адамдардың өліміне не себеп болғаны тексерілуде.
Қаза болғандардың барлығы ер адамдар. Олар 1963, 1975, 1983, 1998, 2006 және 2009 жылдары туған. Әлеуметтік желілерде тараған ақпаратқа сәйкес, 2006 және 2009 жылы дүниеге келген екі жас жігіт – туған ағайындылар. Олармен бірге әкесі де көз жұмған.
Осы күні аталған ферманың иесі, «Стальмонтаж», «Ақтогай-Агро» және Aqtogai Milk компанияларының бас директоры, Павлодар облыстық мәслихатының депутаты Александр Терентьев қайғылы оқиғаға байланысты пікір білдірді.
Александр Терентьев өзінің Instagram парақшасында «Aqtogai Milk» ЖШС-нің ресми хабарламасын жариялады: «Кәсіпорын аумағында оқыс оқиға орын алып, салдарынан алты қызметкер қаза тапты. Тағы бір зардап шегуші Ақтоғай орталық аудандық ауруханасына түсті, оған барлық қажетті медициналық көмек көрсетілуде. «Aqtogai Milk» ЖШС басшылығы мен ұжымы марқұмдардың отбасылары мен жақындарына қайғыра көңіл айтады. Кәсіпорын қаза тапқандардың отбасыларына барлық тиісті көмек пен қолдауды көрсетеді».
Алайда жазбаның астындағы пікірлерде көпшілік «жазатайым оқиға» деген тұжырыммен келіспейтінін білдіріп, газ талдағыш қайда болды, жеке қорғаныс құралдары берілді ме, газ қаупі бар жұмысқа рұқсат қағазы рәсімделді ме, мұндай жұмыстың қауіпсіздігіне жауапты тұлға болған ба деген сауалдар қойып жатыр.
Бұл сұрақтар да негізсіз емес. Өйткені алдын ала мәлімет бойынша, сүт фермасының жеті қызметкері кәріз құдығына түсіп, көмірқышқыл газынан уланған. Олардың біреуі ғана аман қалған. Дегенмен тергеу құпиясына байланысты құқық қорғау органдары оқиғаның нақты мән-жайын жарияламай отыр. Сондықтан қауіпті аймақта жұмыс істеуге қажетті қорғаныс құралдары мен талаптардың сақталған-сақталмағаны әзірге белгісіз.
Бұл шын мәнінде жазатайым оқиға ма, әлде біреудің қызметтік салғырттығының салдары ма – оған тергеу қорытындысы жауап береді. Өкінішке қарай, оның нәтижесі қаза болған адамдарды қайтара алмайды. Бірақ бұл қайғылы жағдай еңбек қауіпсіздігі талаптарын сақтауға қатысты жауапкершілікті күшейтудің қаншалықты маңызды екенін тағы бір мәрте көрсетті.
