Өткен аптада Алматы – Тараз және «Қорғас» бағытында жүрген жүргізушілерге қомақты сомадағы айыппұлдар жаппай келе бастаған.
«Бүгін Алматы маңындағы көлік иелеріне негізсіз, қате айыппұлдар келе бастады. Маған Алматы мен Тараз арасында жолаушы тасымалдайтын таныс такси жүргізушісі хабарласты. Ертең бір топ жүргізуші мән-жайды анықтау үшін Қонаев қаласының Полиция департаментіне бармақ. Олардың бірінің айтуынша, бір күннің ішінде 14 айыппұл келген. Одан бөлек, 4-5 айыппұлдан алған жүргізушілер де аз емес», – деп журналист Ришат Асқарбекұлы Facebook парақшасында жазды
Оның айтуынша, өзі де жуырда «Қорғасқа» барып қайтқан. Осы сапардан кейін оған екі айыппұл келген. Журналист оларды 50 пайыздық жеңілдікпен төлеген.
«Бүгін кешке тағы бір айыппұл келді. Тағы да сол «Қорғас» тасжолы. Хабарламаны мұқият қарасам, көліктің тіркелген жылдамдығы мен белгіленген шектеу сәйкес келмейді. Ештеңе түсінбедім. Бұл жолда жылдамдық 70 және 110 км/сағ деп белгіленген. Сонда 97 км/сағ деген шектеу қайдан шыққан? Төменде суреті бар. Камера көлікті таңғы сағат сегізде тіркеген, ал фотосурет түнде түсірілгендей көрінеді. Сөйтіп, бір аптаның ішінде төрт айыппұл алдым. Өзім жылдамдықты шектен тыс асырып, жолда жүйткіп жүретіндердің қатарынан емеспін. Сонда неге маған 50 мың теңгеге жуық айыппұл келуі керек? Құрметті Үкімет, жүргізушілерге де сәл жанашырлық танытуға болмай ма?» – деді журналист.
Сөйтсе, мәселе жүргізушілерден емес екен. Ақпараттық жүйеде техникалық ақау болған. Осыған байланысты Ішкі істер министрлігі Әкімшілік полиция комитетінің төрағасы Мұрат Қабденов халыққа үндеу жасады .
«13–14 тамыз аралығында Бас прокуратураның «ЕРАП» ақпараттық жүйесінде нұсқамаларды автоматты түрде қалыптастыру кезінде техникалық ақау болды. Соның салдарынан орташа жылдамдыққа қатысты кейбір құқық бұзушылықтар көліктің сол сәттегі жылдамдықты асыруы ретінде қате рәсімделген.
Қазір әріптестерімізбен бірлесіп, техникалық ақаудың салдарын жою жұмыстарын жүргізіп жатырмыз. Жүргізушілерге бірден айтарым: ешқайда барудың қажеті жоқ. Полицияға жүгініп, қандай да бір дәлел ұсынудың да қажеті жоқ. Қате рәсімделген нұсқамалардың барлығы анықталды және автоматты түрде жойылады. (…) Ал мұндай айыппұлдарды төлеп қойған жүргізушілерге қаражатты қайтару тәртібі қазір пысықталып жатыр. Жағдай бақылауда», – деді Мұрат Қабденов.
