ҚазТАГ-тың хабарлауынша, Денсаулық сақтау министрлігі балаларға арналған фастфуд пен қант мөлшері жоғары сусындар жарнамасын шектеуге бағытталған заңнамалық өзгерістер әзірледі. Министрлік мамандарының айтуынша, азық-түлік жарнамасы балалар мен жасөспірімдерге айрықша әсер етеді. Әсіресе көз тартатын қаптама, әлеуметтік желідегі жарнама, блогерлердің ұсынымдары мен басқа да маркетингтік тәсілдер олардың таңдауына ықпал етуі мүмкін. «Министрлік құрамында тұз, қант, қаныққан май мен трансмай мөлшері жоғары өнімдерді телеарналарда, радиода, әлеуметтік желілерде және сыртқы жарнама құралдарында жарнамалауға шектеу енгізу жөнінде ұсыныстар дайындады. Қазір бұл шаралардың ықпалын бағалау үшін реттеушілік әсерге талдау әзірленіп жатыр», – деді ҚР Денсаулық сақтау министрлігі Медициналық көмекті ұйымдастыру департаментінің директоры Гүлнар Сәрсембаева. Министрлік келтірген зерттеу деректеріне сәйкес, 6–9 жастағы балалардың 23%-ында артық салмақ бар, 6%-ына семіздік тән. Бұдан бөлек, жасөспірімдердің 17,5%-ы энергетикалық сусындарды апта сайын ішеді.
Еуразия24 пікірі:
Біздің ойымызша, Денсаулық сақтау министрлігінің бұл бастамасы Президент Қасым-Жомарт Тоқаевтың тамыз конференциясында берген тапсырмасымен байланысты .
Балалар, әсіресе әлеуметтік желіде, жарнаманың ықпалына тез түседі. Осыны ескерсек, өнімнің өзіне тыйым салмай, ең алдымен балаларға арналған жарнаманы шектеу қисынды қадам.
Алайда мұндай шараның түпкі нәтижесі қандай болмақ деген сұрақ бар. Қазақстанда фастфуд, газды сусындар, тәттілер мен денсаулыққа зияны көп өзге де тағамдарды балаларға сатуға тыйым салынбаған. Темекі, алкоголь мен энергетикалық сусындарға қойылғандай жас шектеуі бұл өнімдерге қолданылмайды.
Сондықтан TikTok-та гамбургер жарнамасының көрсетілмеуі балалардың тамақтану дағдысын түбегейлі өзгертеді деу қиын. Өйткені фастфуд мектепке жақын дүкендер мен дәмханаларда бұрынғыдай еркін сатыла береді. Оның үстіне балалар үшін мұндай тағам мектеп асханасындағы бағасы қалтаға салмақ түсіретін тоқаштан әлдеқайда тартымды.
