KazTAG агенттігінің жұма күнгі хабарламасында былай делінген: «Қазақстан Республикасының Ұлттық статистика бюросының ресми ақпаратына сәйкес, 2024 жылдың қорытындысы бойынша ел экономикасының нақты өсімі 5% деңгейінде тіркелді. Бұған дейінгі жедел бағалау нәтижесінде бұл көрсеткіш 4,8% болады деп болжанған еді». Аталған ақпаратқа сәйкес, 2024 жылғы экономикалық өсімге мұнайға қатысы жоқ салалардың дамуы негізгі үлес қосқан. Атап айтқанда, тауар өндіру көлемі 6,3%-ға артқан (алдын ала бағалауда – 5,5%), қызмет көрсету секторы 4,6%-дық өсім көрсетті. Бұған дейін 5,9% деп бағаланғанымен, өңдеу саласындағы нақты өсім 6,8%-ды құрап, негізгі қозғаушы күштердің біріне айналды. Бұл – 2011 жылдан бергі ең жоғары көрсеткіш. Сонымен қатар, құрылыс саласы 13,1% емес, 15,3% өсім көрсетсе, ауыл шаруашылығындағы өсім 13,3% орнына 13,7%-ды құрады, делінген хабарламада.
Евразия24 пікірі:
Бар болғаны алты ай бұрын Халықаралық валюта қоры мен Дүниежүзілік банк Қазақстандағы миссияларының қорытындысы бойынша 2024 жылы ел экономикасының өсу қарқыны 4% деңгейінде болады деп болжаған еді. Ал 2025 жылы бұл көрсеткіш 5%-ға жетуі мүмкін екені айтылған. Халықаралық валюта қоры өз кезегінде республиканың бюджеттік тәртіп пен оны жоспарлау салаларында бірқатар кемшіліктер бар екенін атап көрсетіп, процикликалық фискалдық саясаттың сақталуына байланысты соңғы жылдары Ұлттық қордан бөлінетін трансферттерге тәуелділік артып отырғанына назар аударған. Айта кету керек, ХВҚ мен Дүниежүзілік банктің зерттеу қорытындылары – бұл Қазақстанның Ұлттық статистика бюросының деректері емес. Себебі бюро өз есептерінде мемлекеттік органдар мен жергілікті атқарушы биліктерден алынған ресми ақпаратқа сүйенеді. Мысал ретінде 2024 жылы ауыл шаруашылығындағы мал мен құс саны бойынша тіркелген елеулі сәйкессіздікке қатысты қоғамда үлкен резонанс тудырған жағдайды келтіруге болады. Онда Ұлттық статистика бюросы 2024 жылдың өсімін шынайы емес, болжалды деректер негізінде бар болғаны 0,2 пайыздық тармаққа көтерді дегенге сенім қайдан туындайды?
